Ka ndërruar jetë 17-vjeçari që u plagos aksidentalisht nga shoku pak ditë më parë. Rreth orës 01:40, pas njoftimit se në rrugën “Berit Beker” ishte plagosur me armë zjarri një 17-vjeçar, shërbimet e Sektorit për Hetimin e Krimeve të Rënda shkuan në vendngjarje për sqarimin e rrethanave dhe dokumentimin ligjor. Nga veprimet e para hetimore rezulton se në banesën e shtetasit R. S., 19 vjeç, ky i fundit, duke i treguar armën e zjarrit pistoletë shokut të tij dhe duke menduar se nuk kishte fishek në fole, e ka shkrepur aksidentalisht dhe për pasojë është plagosur 17-vjeçari.
Në përfundim të veprimeve të para hetimore u bë arrestimi në flagrancë i shtetasit R. S., 19 vjeç, për veprat penale “Plagosja e rëndë nga pakujdesia”, “Veprime që pengojnë zbulimin e së vërtetës” dhe “Mbajtja pa leje e armëve dhe municionit luftarak”. Po ashtu u arrestuan shtetasit A. V., 20 vjeç, dhe H. H., 22 vjeç, për veprën penale “Veprime që pengojnë zbulimin e së vërtetës”. U sekuestrua arma e zjarrit që 19-vjeçari e posedonte pa leje.
Teksti bën të ditur gjithashtu se 17-vjeçari ndodhet në spital, nën kujdesin e mjekëve. Vijojnë hetimet për dokumentimin e plotë të rastit dhe sqarimin e të gjitha rrethanave të ngjarjes. Materialet procedurale i janë kaluar Prokurorisë për veprime të mëtejshme. Lajmi është shpërndarë nga Top Channel.
