Victoria Beckham ka deklaruar se nuk ka plane për t’u tërhequr nga karriera, duke thënë se puna mbetet një nga pasionet e saj më të mëdha. Në një intervistë për The Times, e publikuar më 27 maj, stilistja dhe ish-anëtarja e Spice Girls u shpreh: “E dua atë që bëj dhe i dua njerëzit me të cilët punoj. Për momentin, nuk mendoj fare për pensionimin”. Ajo tha se do ta kishte të vështirë të qëndronte pa punë dhe se i pëlqen të jetë vazhdimisht aktive: “Do të mërzitesha shumë nëse nuk do të punoja. Më pëlqen të jem e zënë. Gjithashtu, dua që fëmijët e mi të shohin sa e apasionuar jam pas asaj që bëj”.
Beckham theksoi se së bashku me bashkëshortin, David Beckham, kanë synuar t’u japin fëmijëve shembullin e etikës së punës dhe përkushtimit. “Mendoj se është e rëndësishme që fëmijët të shohin prindërit e tyre duke punuar fort dhe duke ndjekur pasionin e tyre”, tha ajo.
Victoria u bë e famshme në vitet ’90 si pjesë e Spice Girls dhe më pas ndërtoi një karrierë në modë me markën e saj personale. Në dokumentarin e saj të publikuar nga Netflix në vitin 2025, ajo foli për periudhën më të vështirë financiare të biznesit. Beckham rrëfeu se “Pothuajse humba gjithçka. Ishte një periudhë shumë e errët. Qaja çdo ditë para se të shkoja në punë sepse ndihesha sikur po shuaja zjarr pas zjarri”, duke shtuar se kompania po përballej me humbje prej dhjetëra milionë dollarësh dhe se presioni ishte bërë i padurueshëm.
Ajo përmendi rëndësinë e mbështetjes së David Beckham, i cili ishte jo vetëm bashkëshort por edhe partner në biznes gjatë atyre kohëve të vështira. Më vonë, Victoria bashkëpunoi me sipërmarrësin David Belhassen, i cili i kërkoi të ristrukturonte plotësisht kompaninë për ta shpëtuar nga falimentimi. Për atë periudhë ajo tha: “Njerëzit kishin frikë të më thoshin ‘jo’. E kuptova se kisha humbur rrugën dhe kishte shumë gjëra që duhej t’i ndryshoja”.
