Napoli është shumë pranë vendimmarrjes për trajnerin e ri pas largimit të Antonio Contes, me garën që duket se po përqendrohet mes Massimiliano Allegrit dhe Vincenzo Italianos. Në ditët e fundit, Italiano ishte konsideruar favorit pas kontakteve intensive mes presidentit Aurelio De Laurentiis dhe rrethit të trajnerit të Bologna-s, por situata ndryshoi dhe Allegri riktheu avantazhin në fazën përmbyllëse.
Sipas mediave italiane, Napoli po zhvillon negociata intensive me Allegrin për një kontratë dyvjeçare me opsion rinovimi. De Laurentiis synon të përfundojë marrëveshjen para se të nisë udhëtimin drejt Shteteve të Bashkuara javën e ardhshme. Raportohet se presidenti i klubit nuk e ka humbur kurrë vëmendjen ndaj Allegrit, të cilin e vlerëson si profilin ideal për shkak të përvojës së tij në Serie A dhe në kompeticionet evropiane. Në bisedime thuhet se është diskutuar një kontratë deri në vitin 2028 me një pagë rreth 5 milionë euro në sezon.
Ndërkaq, Vincenzo Italiano zyrtarizoi ndarjen me Bologna-n. Klubi emilian njoftoi ndërprerjen me mirëkuptim të kontratës, duke i dhënë fund bashkëpunimit dyvjeçar që kulmoi me fitimin e Kupës së Italisë në vitin 2025. Në deklaratën zyrtare, Bologna falënderoi Italianon për punën dhe sukseset e arritura, ndërsa trajneri kishte bërë me dije më parë se e konsideronte të mbyllur ciklin e tij te skuadra.
Lëvizja e Italianos drejt lirimit përforcoi thashethemet për një kalim te Napoli, por në orët e fundit Allegri duket se ka bërë një hap vendimtar për t’u emëruar në drejtimin e “azzurrëve”. Klubi dhe palët e përfshira po përpiqen të mbyllin detajet e kontratës në periudhën e shkurtër që mbetet para nisjes së zotit De Laurentiis për në Shtetet e Bashkuara.
Top Channel
