Asistenti personal i aktorit Matthew Perry, Kenneth Iwamasa, është dënuar me 3 vjet e 5 muaj burg për rolin e tij në vdekjen nga mbidoza të yllit të serialit “Friends”, ngjarje e ndodhur më 28 tetor 2023 në shtëpinë e aktorit në Los Angeles. Iwamasa, 60 vjeç, u shpall fajtor për blerjen dhe administrimin e ketaminës që, sipas hetuesve, çoi në mbidozën fatale të Perry-t. Dënimi i tij shënon përmbylljen e një procesi gjyqësor që zgjati rreth dy vjet e gjysmë dhe përfshiu pesë të pandehur.
Gjatë seancës gjyqësore, gjykatësja theksoi se Iwamasa ishte në dijeni të varësisë së aktorit dhe se sjellja e tij ishte e papërgjegjshme, jo vetëm në ditën e vdekjes, por edhe në ditët para saj. Prokuroria deklaroi se ai ka shërbyer si ndihmës për sigurimin dhe administrimin e drogës, duke qenë i vetëdijshëm për rrezikun që paraqiste përdorimi i ketaminës.
Hetimet zbuluan se Iwamasa njihte Matthew Perry-n që nga viti 1992 dhe kishte nisur të punonte si asistent i tij në vitin 2022, me një pagë vjetore prej rreth 150 mijë dollarësh. Ai ishte gjithashtu personi që e gjeti aktorin të pajetë në vaskën e shtëpisë së tij. Para shpalljes së dënimit, Iwamasa shprehu pendesë, duke i kërkuar falje familjes dhe miqve të aktorit dhe duke pranuar përgjegjësinë për veprimet e tij.
Në lidhje me rastin, më parë janë dënuar edhe persona të tjerë të përfshirë në rrjetin e shpërndarjes së ketaminës, përfshirë mjekë dhe ndërmjetës. Dënimet për ta kanë varuar nga arresti shtëpiak deri te burgimi disa vjeçar. Ky proces gjyqësor, sipas burimeve të çështjes, përfshiu hetime mbi mënyrën e sigurisë dhe shpërndarjes së lëndës narkotike që çoi në mbidozën fatale.
Teksti buron nga raportimi i Top Channel.
