Gjermania do t’i qaset Botërorit 2026, që do të zhvillohet në Kanada, Meksikë dhe SHBA, duke u përqendruar vetëm në aspektin sportiv dhe pa ndërmarrë nisma apo marrë pozicione politike para ndeshjeve. Këtë qëndrim e konfirmoi Drejtori Sportiv i përfaqësueses gjermane, Rudi Voeller, i cili nënvizoi se “konteksti politik i turneut nuk do të duhet të ndërhyjë në përgatitjen e ndeshjeve”. Ai bëri të qartë se nuk do të përsëriten veprime politike përpara takimeve apo intervista mbi tema politike, duke iu referuar diskutimeve që ndezën gjatë Botërorit 2022 në Katar.
Voeller rikujtoi rastet kur kombëtarja gjermane u gjend në qendër të vëmendjes për disa nisma simbolike, përfshirë protestën e futbollistëve që mbuluan gojën në fotografinë e bërë përpara ndeshjes me Japoninë, një akt që u konsiderua reagim ndaj kufizimeve të FIFA-s mbi përdorimin e shiritit me ngjyrat e ylberit. Ai theksoi se skuadra nuk pretendon të jetë apolitike, por solli në pah kufijtë e rolit të futbollit në çështje më të gjera: “Ka shumë gjëra në botë që nuk na pëlqejnë”, tha Voeller, dhe shtoi se edhe ai do të preferonte “më shumë paqe gjithandej”, por përkujtoi se futbolli nuk mund të zgjidhë problemet globale dhe se misioni kryesor i skuadrës është të luajë Kupën e Botës, që sipas tij “vjen përpara gjithçkaje”.
Drejtori Sportiv insistoi në nevojën për të ndarë sportin nga politika dhe u shpreh kundër kërkesave për bojkotimin e turneut. Ai solli përvojën e tij personale si argument, duke kujtuar se që në moshë të re ka qenë kundër bojkoteve dhe se, siç tha, bojkoti i Lojërave Olimpike të Moskës në 1980 ishte “i gabuar dhe nuk solli asgjë”. Në qëndrimin e tij kompaktohet një qasje e fokusuar në përgatitjen sportive dhe shmangien e iniciativave politike gjatë pjesëmarrjes së Gjermanisë në Botërorin 2026.
