Nuredin Dumani, i penduar i drejtësisë, rrëfen në seancë kujtime të shpërndara dhe emocione rreth daljes nga burgu dhe ngjarjeve pas saj. Ai thotë: “Nuk e di kur dola, ose 2021 ose 2012, nuk më kujtohet, ishte se dola nga burgu dhe i thashë për një shef policie që ka qenë tek komisariati numër gjashtë, pasi më goditi disa herë atë natë kur jam arrestuar, dhe kur kam dalë nga burgu mora vesh, thashë shyqyr që e vranë se më goditi kot, më hyri në hak, bëhet fjalë për Dritan Lamaj. Më u bë qejfi shumë që e kanë vrarë, do u jepja një drekë po t’i njihja ata çunat. E më tha kur të duash se vëllai jonë është tha.” Në dialog me gjykatën, kur pyetet “Kush ishte vëllai i Festimit se s’po e kuptoj?”, Dumani përgjigjet se ishte Henrik Hoxha, dhe sqaron se i referoheshin si “vëlla” sepse ishte caktuar si i tillë, edhe ai thotë se ka vëlla gjenetik.
Prokurorja e SPAK, Doloreza Musabelliu, shpjegon arsyet e bashkëpunimit me drejtësinë: “Jo më kot iu vu emri ‘Plumbi i artë’, se qe pikërisht ai plumb që mori që shërbeu si shkak të kthehej në bashkëpunëtor drejtësie. Ai vendosi të tregojë çdo gjë sepse mendonte që grupi kriminal me të cilin kishte bashkëpunuar e kishte nxjerrë në pritë. Shkaqet mund të jenë nga më të ndryshmet, ata llogarisin përfitimet, mund të vijë edhe nga vetë ai.”
Në laboratorët e policisë shkencore, fjalët e të penduarve shërbejnë për të lidhur provat e pazgjidhura dhe për të rikthyer në jetë dosje të mbetura pa autorë. Disa prova ruhen të arkivuara, duke pritur krahasim me krimet e reja, ndërsa në rastin më të mirë konfirmimi vjen pas gjetjes së një të penduari pas arrestimit. Si shembull përmendet bluza që Dumani mbante kur u plagos, e cila ruhet si provë kundër atyre që tentuan ta ekzekutonin.
Ekspertët teknikë konstatojnë prani të vrimave të shkaktuara nga armë zjarri: “Këtu kemi konstatuar që kemi një vrimë të vogël që duhet të jetë e shkaktuar nga armë zjarri, vëmë metrin për ta paraqitur në aktet e shoqërimit dhe e fiksojmë, por kjo bluzë i kalon edhe balistikës dhe pastaj…” Disa të penduar tregojnë me detaje emra dhe mënyra veprimi të grupeve kriminale, nga vëzhgimi i shënjestrave te pagesat dhe kërkimi i tradhtarëve.
