Sot në Kuvend mbahet seanca plenare e radhës me fillim në ora 10:00. Në Rendin e Ditës janë parashikuar 9 interpelanca, 1 seancë pyetje‑përgjigje dhe disa projektligje. Urdhri i ditës është nxjerrë në mbështetje të urdhrit nr. 33, datë 19.5.2026 të Kryetarit të Kuvendit, z. Niko Peleshi.
Dy interpelanca janë drejtuar ndaj Kryeministrit Edi Rama: njëra e kërkuar nga një grup deputetësh i Grupit Parlamentar të Partisë Demokratike dhe tjetra e nisma e deputetëve Agron Shehaj dhe Erald Kapri (Partia Mundësia). Shtatë interpelancat e tjera përfshijnë: një interpelancë urgjente me Ministrin e Punëve të Brendshme, z. Besfort Lamallari, e kërkuar nga grupi i PD; dy interpelanca me Ministren e Shëndetësisë dhe Mirëqenies Sociale, znj. Evis Sala, të kërkuara përkatësisht nga deputeti Saimir Korreshi dhe deputetja Erisa Xhixho; dy interpelanca me Ministrin e Infrastrukturës dhe Energjisë, z. Enea Karakaçi, të kërkuara nga deputeti socialist Erion Braçe; një interpelancë me Ministren e Arsimit, znj. Mirela Kumbaro, e kërkuar nga deputetja Ina Zhupa; dhe një interpelancë me Ministrin e Bujqësisë dhe Zhvillimit Rural, z. Andis Salla, e kërkuar nga deputetët Agron Shehaj dhe Erald Kapri.
Rendi i Ditës përfshin gjithashtu një seancë pyetje–përgjigje me Ministren e Shëndetësisë, znj. Evis Sala, e kërkuar nga deputeti Erald Kapri. Midis pikave të tjera janë miratimi i procesverbalit të seancës së datës 14.5.2026 dhe njoftimet zyrtare.
Në pjesën legjislative janë parashikuar disa projektligje dhe një projektvendim: projektligji për ratifikimin e kontratës financiare ndërmjet Republikës së Shqipërisë dhe Bankës Evropiane të Investimeve për punimet e infrastrukturës bashkiake të projektit “Porta e Alpeve”; projektligji për ndryshime dhe shtesa në ligjin nr. 72/2012 për infrastrukturën kombëtare të informacionit gjeohapësinor; projektligji për ndryshime dhe shtesa në ligjin nr. 29/2024 “Për burimet ujore”; dhe projektvendimi për ndryshime në Rregulloren e Kuvendit (vendimi nr. 166, datë 16.12.2004). Seanca parashikon gjithashtu diskutime për çështje jashtë rendit të ditës. Top Channel.
