Në mesnatë, në Shkozë, ndodhi një ngjarje me armë zjarri ku mbeti i plagosur punonjësi i policisë Anxhelo Kumaraku. Specialistët për Hetimin e Krimeve të Rënda, në vijim të veprimeve hetimore të drejtuara nga Prokuroria e Tiranës, identifikuan dhe shpallën në kërkim dy të dyshuarit, vëllezërit A. L., 33 vjeç, dhe A. L., 22 vjeç. Nga hetimet paraprake dyshohet se këta shtetas qëlluan me armë zjarri nga automjeti i tyre në drejtim të shtetasit K. S., i cili ndodhej pranë banesës së tij së bashku me Anxhelon Kumarakun dhe L. D.
Si pasojë e të shtënave, Anxhelo Kumaraku, 30 vjeç, punonjës i policisë jashtë shërbimit, u dëmtua aksidentalisht në këmbë. Ai po merr mjekim dhe ndodhet jashtë rrezikut për jetën. Në vijim të veprimeve për rastin u arrestua shtetasi K. S., 31 vjeç, pasi rezultoi se kishte thyer masën e sigurisë “Arrest në shtëpi”, të caktuar nga gjykata për veprën penale “Armëmbajtja pa leje”. Po punohet për kapjen e dy shtetasve të shpallur në kërkim.
Drejtori i Përgjithshëm i Policisë së Shtetit pezulloi menjëherë nga detyra punonjësin e policisë dhe Drejtoria e Standardeve Profesionale nisi hetim disiplinor për shkelje të rëndë disiplinore. Hetimi disiplinor ndaj Anxhelo Kumarakut është për shkelje të parashikuara nga ligji nr. 82/2024 “Për Policinë e Shtetit”, pasi ai është konstatuar duke u shoqëruar me një person që kishte thyer masën e sigurisë “Arrest në shtëpi” dhe nuk ka njoftuar shërbimet policore dhe eprorët për këtë rast.
Hetimet për dokumentimin e plotë të ngjarjes vazhdojnë në bashkëpunim me Prokurorinë dhe me Agjencinë e Mbikëqyrjes Policore. Materialet procedurale janë referuar Prokurorisë për veprime të mëtejshme.
