Është zbuluar drafti final i rezolutës për anëtarësimin e Republikës së Shqipërisë në Bashkimin Evropian, materialet e të cilit i ka siguruar gazetari i Top Channel, Muhamed Veliu. Drafti, që sipas dokumentit është dakordësuar nga PS dhe PD, është dërguar në Kuvend. Titulli i dokumentit është “PËR PROCESIN E ANËTARESIMIT TË REPUBLIKËS SË SHQIPËRISË NË BASHKIMIN EVROPIAN” dhe referon zbatimin e Kushtetutës së Republikës së Shqipërisë, neneve 18 dhe 103/1 të Rregullores së Kuvendit, si dhe nenit 18, pika 1, të Ligjit nr. 15/2025 “Për rolin e Kuvendit në procesin e negociatave dhe anëtarësimit të Republikës së Shqipërisë në Bashkimin Europian”, të ndryshuar.
Në draft theksohet rikonfirmimi se anëtarësimi në BE përbën objektiv strategjik kombëtar, i cili udhëheq dhe orienton agjendën reformuese të vendit për transformimin demokratik, institucional, ekonomik dhe social. Dokumenti nënvizon përgjegjësinë kushtetuese të Kuvendit për mbikëqyrjen e procesit të integrimit, për forcimin e kontrollit parlamentar dhe për garantimin e transparencës së veprimeve në këtë proces. Drafti thekson gjithashtu se orientimi evropian është një zgjedhje e vullnetit të lirë, me rëndësi strategjike mbarëkombëtare, që gëzon mbështetje të gjerë qytetare dhe përfaqëson angazhim të qëndrueshëm ndaj vlerave themelore të Bashkimit Evropian, përfshirë demokracinë, shtetin e së drejtës, lirinë, bashkëjetesën, barazinë dhe dinjitetin njerëzor.
Dokumenti rikujton rëndësinë e respektimit të kritereve të Kopenhagës dhe parimin se procesi i anëtarësimit duhet të bazohet në meritë, kushte të drejta dhe zbatim real të reformave, në përputhje me standardet demokratike dhe respektimin e të drejtave themelore. Në tekst vërehet se Shqipëria ka hapur me shpejtësi të gjithë kapitujt e negociimit dhe është në pritje të miratimit të raportit IBAR. Drafti gjithashtu vlerëson se procesi i zgjerimit zhvillohet në një kontekst gjeopolitik të ndjeshëm, që kërkon riformësim të shpejtë të institucioneve dhe përparim të matshëm në fusha kyçe si funksionimi demokratik i institucioneve, gjyqësori dhe të drejtat themelore, drejtësia, liria dhe siguria, prokurimi publik, kontrolli financiar, statistikat, kriteret ekonomike dhe reforma në administratën publike.
