Propozimet për uljen e çmimit të karburantit—përmes reduktimit të taksës së qarkullimit dhe taksave të tjera, për uljen e akcizës mbi naftën dhe dieselin, si dhe për zerimin e akcizës së gazit për industrinë prodhuese “Made in Albania”—u rrëzuan në komisionet parlamentare me votat e deputetëve socialistë. Bozdo theksoi se ky qëndrim nuk është surprizë, por njoftoi për pasojat konkrete të refuzimit.
Sipas tij, litri i naftës do të ishte të paktën 350 lekë të vjetra më i lirë; për çdo 10 litra qytetarët do të kursenin rreth 3,500 lekë të vjetra, ose do të mund të blinin rreth 3 litra më shumë karburant. Gazi industrial për prodhimin vendas do të kushtonte zero lekë për kilogram, nga 125 lekë/kg që kushton aktualisht. Bozdo tha gjithashtu se çdo familje shqiptare do të kursente mesatarisht rreth 70 euro në muaj në rast se këto masa do të ishin miratuar.
Ai përmendi ndikimin në sektorë kyç: fermerët, që sipas tij sot përballen me një çmim “absurd” prej 2,200 lekësh për litër, do të kishin mundësi reale të punonin tokën; industria prodhuese, veçanërisht ajo eksportuese, do të ulte kostot deri në 25%, duke u bërë më konkurruese në tregun vendas dhe në eksport. Bozdo theksoi se refuzimi i nismave është një zgjedhje politike dhe përbën mosveprim të qeverisë për t’u përgjigjur ndaj krizës së çmimeve.
Ai vuri në dukje gjithashtu se Shqipëria vazhdon të renditet ndër vendet me çmimin më të lartë të karburantit në botë, dhe se kjo politikë po dëmton fermerët si dhe ekonominë familjare dhe prodhuese. Refuzimin e propozimeve Bozdo e përshkroi si vendim politik të një qeverie pa vullnet për të ndërhyrë në mbrojtje të qytetarëve, dhe akuzoi Edi Ramën se nuk mori masa konkrete për të përballuar krizën e çmimeve, duke lënë familjet dhe ekonominë vendase “në mëshirë të fatit dhe zhvillimeve të konfliktit në Lindjen e Mesme”, tha Bozdo.
