SPAK ka kërkuar shpalljen fajtor dhe dënimin me gjashtë vite burg për Shpend Sokolin, të akuzuar për “Mashtrim kompjuterik” dhe “Grupi i strukturuar kriminal”. Dosja e siguruar nga Top Channel tregon se nga nëntori 2022 FBI po hetonte tregun e paligjshëm online Rydox. Rydox, që për disa muaj në 2020 ishte jashtë linje dhe u rihap në shtator 2020, reklamonte në Raidforums dhe ofronte shitjen e kredencialeve për llogari email, e-commerce dhe platforma takimesh, si dhe shitjen e të dhënave personale të viktimave (PII).
Bazuar në shqyrtimin e të dhënave të faqes, përdoruesit kryesorë rezultojnë aktorë të krimit kibernetik që blejnë dhe shesin informacione identifikimi personal. Rydox vetë e përshkruante veten si “Treg i nëndheshëm online”. Në shkurt 2023 forcat e zbatimit të ligjit, në koordinim me autoritete të një vendi tjetër, morën provë shkencore të një serveri që shërbente për rydox.cc. Bazat e të dhënave përfshinin mbi 18,000 llogari përdoruesish, përfshirë usernames, adresat email, transaksione monetare virtuale, paketat e blera dhe të dhëna të lidhura me këto paketa, si edhe lidhje për dosje që supozohet përmbanin të dhëna të blera.
Nga ana e FBI-së, analiza e bazës së të dhënave dhe hetimet çuan në identifikimin e tre administratorëve të tregut Rydox. Shpend Sokoli, nga Kosova, u identifikua si një nga zhvilluesit e faqes dhe si bashkëpronar i kompanisë shqiptare Scythe Labs. Ai dyshohet të ketë bashkëpunuar me dy persona të tjerë, Ardit Kutleshi dhe Jetmir Kutleshi, për kryerjen e aktivitetit të paligjshëm, ndërsa të tre ishin nën hetim nga FBI.
Si pjesë e përgjigjes ndaj kërkesës për ndihmë juridike, autoritetet shqiptare dërguan dokumente dhe materiale proceduriale drejt SHBA-së. Në komunikimet e rrjetit Facebook, që fillojnë më 30 maj 2016, vërehet se ka pasur rregullim të marrëdhënieve mes Ardit Kutleshit dhe Shpend Sokolit për rolet dhe përfitimet e bashkëpunimit. Këto komunikime tregojnë diskutime mbi ndërtimin dhe programimin e funksioneve të Rydox, lidhjet me hoste dhe domain-e, çështje teknike dhe financiare, si dhe kërkesa të Sokolit për përfitime materiale nga bashkëpunimi.
