Në ambientet e Fakultetit të Historisë dhe të Filologjisë të Universitetit të Tiranës u zhvillua për herë të parë Kampionati i Shahut, organizuar në bashkëpunim me Departamentin e Edukimit Fizik dhe Sporteve Universitare. Ngjarja u mbështet nga Dekani i Fakultetit, Mark Marku, ndërsa kontribut dha edhe mjeshtri i sportit dhe arbitri ndërkombëtar Shkëlqim Lazaj.
Dekani Mark Marku vlerësoi rëndësinë e shahut dhe e lidhi iniciativën me përvojën e tij personale nga koha e gjimnazit. Sipas tij, shahut i jepet një dimension praktik si ushtrim për mendjen dhe si mënyrë për të përfshirë njerëz me vështirësi të ndryshme: “Është një sport që është shumë i rëndësishëm. Unë vet kam pasur një histori kur kam qenë në gjimnaz. Kisha një shok klase që ishte me probleme në shikim dhe në luanim bashkë. Ai e bënte lojën në imagjinatë. Ishte një kujtim shumë i mirë dhe ushtrim shumë efikas për mendjen. Kjo do jetë një nisje për një kampionat shahu në shkallë universiteti”, deklaroi Marku, duke theksuar se eventi synon të shërbejë si fillim i aktiviteteve të ngjashme në nivel universiteti.
Shkëlqim Lazaj, mjeshtër shahu dhe arbitër ndërkombëtar, theksoi rëndësinë sociale të sportit, duke vënë në pah se shahu ofron mundësinë për të njohur njerëz të rinj dhe për të krijuar miqësi, edhe me kundërshtarin gjatë lojës.
Studentë të Fakultetit të Gazetarisë dhe Komunikimit ndanë përvojat e tyre në kampionat. Angjelo Tila theksoi efektin e shahut në zhvillimin e mendimit kritik: “Nëse shahu ka diçka që e bënë mirë është të forcon mendimin kritik.” Ndërkaq, Anisa Disha, e cila u shpall në vendin e dytë në kampionat, përshkroi shahun si një formë terapie për largimin e stresit të përditshëm dhe si një strategji që përfshin edhe aspektin e komunikimit: “Për mua shau ka qenë një mënyrë terapie për të hequr streset e ditës. Shahu mund të shihet vetëm si disa lëvizje matematikore, por është më shumë një strategji e ndërthurur edhe me komunikimin.”
Kampionati shënon një nisje të organizimit të shahut në ambientet universitare dhe pasqyron interesin e studentëve dhe stafit akademik për zhvillimin e kësaj loje si aktivitet sportiv dhe intelektual. (Burimi: Top Channel)
