Kreu i Partisë Demokratike, Sali Berisha, zhvilloi në Zagreb një takim me Kryeministrin e Kroacisë, Andrej Plenković, në kuadër të punimeve të Forumin të International Democrat Union (IDU). Gjatë bisedimeve u diskutuan zhvillimet politike në Shqipëri dhe rajon, si dhe procesi i integrimit europian i vendeve të Ballkanit Perëndimor. Berisha theksoi se procesi i integrimit duhet të bazohet në meritë dhe në përmbushjen e standardeve demokratike.
Kreu i PD-së shprehu shqetësime për gjendjen në vend, duke vënë në dukje regresin demokratik dhe tendencat autokratike të qeverisjes. Ai përmendi mungesën e zgjedhjeve të lira dhe të ndershme, ndikimin e krimit të organizuar dhe të karteleve të drogës në procesin zgjedhor dhe në jetën ekonomike të vendit, si dhe nivelet e larta të korrupsionit. Sipas Berishës, këto probleme duhet të merren parasysh në vlerësimin për avancimin në procesin e integrimit europian.
Të dyja palët u dakorduan që hyrja në Bashkimin Europian nuk duhet të bazohet vetëm në konsiderata gjeostrategjike, por kryesisht në plotësimin e kritereve dhe standardeve demokratike. Nga ana e tij, Kryeministri Andrej Plenković rikonfirmoi mbështetjen e Kroacisë për Shqipërinë dhe për procesin e integrimit europian, duke nënvizuar rëndësinë e një procesi të bazuar në meritë.
Përveç takimit me kryeministrin kroat, Sali Berisha realizoi edhe një takim me Presidentin e IDU, Stephen Harper. Berisha shprehu mirënjohjen për mbështetjen e vazhdueshme që IDU i ka dhënë Partisë Demokratike gjatë periudhave më të vështira politike në Shqipëri. Gjatë takimit me Harper, Berisha ngriti një sërë shqetësimesh lidhur me gjendjen demokratike në vend, duke iu referuar vlerësimeve ndërkombëtare që e klasifikojnë Shqipërinë si “autokraci elektorale”.
Lajmi u përcoll nga Top Channel.
