Në Vlorë është evidentuar një precedent për ndërtime pa leje, ku një shtetas u kap duke ndërhyrë në mënyrë të paligjshme në një mol të ndërtuar në det në zonën e Jonufrës. Si përgjegjës është arrestuar në flagrancë shtetasi B. M., 47 vjeç, banues në Vlorë. Ai u kap nga shërbimet e Policisë në vendin e quajtur “Gjiri i Kaltër” duke kryer punime ndërtimi pa lejen përkatëse nga organet kompetente.
Policia e Vlorës njofton se shtetasi kishte ndërhyrë në vijën bregdetare të parashikuar për projektin “Lungomare 3”, duke bërë punime mbi një mol ekzistues dhe duke e shtuar atë në mënyrë të paligjshme. Rasti u evidentua gjatë kontrolleve të shtuara dhe monitorimit të vazhdueshëm të territorit, të kryera me qëllim mbrojtjen e hapësirave publike dhe vijës bregdetare.
Në njoftimin zyrtar theksohet se këto kontrolle synojnë parandalimin dhe goditjen e ndërtimeve pa leje, me fokus zonat bregdetare. Policia e Vlorës vijon kontrollet intensive në të gjithë territorin për të parandaluar dhe goditur çdo rast të ndërtimeve të paligjshme, si dhe për të garantuar zbatimin e ligjit dhe mbrojtjen e pronës publike.
Materialet procedurale lidhur me rastin janë referuar Prokurorisë së Vlorës për veprën penale “Ndërtimi i paligjshëm”. Arrestimi në flagrancë i shtetasit B. M. u realizua si rezultat i veprimeve në terren nga shërbimet e Komisariatit të Policisë Vlorë, pjesë e kontrolleve të shtuar të ndërmarra nga autoritetet lokale për të mbrojtur vijën bregdetare dhe hapësirat publike nga ndërhyrjet pa leje.
