Ambasadori amerikan në NATO, Matthew Whitaker, ka nisur një vizitë dyditore në Kosovë, gjatë së cilës do të takohet me zyrtarë shtetërorë, përfshirë kryeministrin Albin Kurti. Sipas Ambasadorisë amerikane në rrjetet sociale, “Vizita e tij paraqet një mundësi për të diskutuar interesat e përbashkëta të sigurisë dhe rolin e vazhdueshëm të Kosovës në kontributin ndaj prioriteteve rajonale dhe globale të sigurisë së SHBA-së.” Në nisje të vizitës, Whitaker u takua me komandantin e misionit paqeruajtës të NATO-s në Kosovë, KFOR, gjeneralmajorin Ozgan Ulutash.
Ulutash e informoi ambasadorin për situatën e sigurisë në rajon dhe vuri në pah rolin e KFOR-it për “ruajtjen e një mjedisi të sigurt” për të gjithë njerëzit në Kosovë. Misioni bëri me dije se “gjeneralmajori Ulutash shprehu mirënjohjen për kontributin e kamotshëm dhe të çmuar të SHBA-së në misionin e KFOR-it.”
Kosova aspiron anëtarësimin në NATO, ndërsa katër vende brenda aleancës ende nuk e njohin pavarësinë e saj. Shtetet e Bashkuara përkrahin aspiratën e Kosovës për anëtarësim. Kosova e konsideron aleancën me SHBA-në si të qenësishme, duke vënë në dukje kontributin amerikan në pavarësinë dhe shtetndërtimin e vendit.
Forca e Sigurisë së Kosovës (FSK) është në proces transformimi drejt një ushtrie të plotë, proces që pritet të përmbyllet më 2028. SHBA-ja ka mbështetur këtë shndërrim, ndërsa NATO-ja ka kërkuar që FSK-ja të vazhdojë t’u përmbahet detyrave të saj fillestare, si reagimi ndaj krizave dhe mbrojtja civile. Në kuadër të transformimit, Prishtina po pajiset me armatime të reja, përfshirë pajisje të prodhuara në SHBA, dhe është mikpritëse e bazës amerikane Bondsteel, më e madhja në Ballkan.
Kosova do të bëhet gjithashtu pjesë e Forcës Ndërkombëtare Stabilizuese për Gazën, një mekanizëm i krijuar si pjesë e nismës së Bordit të Paqes, të propozuar nga presidenti amerikan Donald Trump. Shteti është ndër pesë vendet e para — së bashku me Indonezinë, Marokun, Kazakistanin dhe Shqipërinë — që janë zotuar për angazhim në mision, me qëllim ofrimin e sigurisë dhe mbikëqyrjen e armëpushimit në Rripin e Gazës. Para vizitës në Kosovë, Whitaker ishte në Maqedoninë e Veriut dhe Kroaci.
