Presidentja e Parlamentit Europian, Roberta Metsola, ka vlerësuar Shqipërinë në rrugën e saj drejt integrimit në Bashkimin Europian. Ajo u shpreh se Mali i Zi dhe Shqipëria janë në krye të procesit të anëtarësimit, duke nënvizuar se perspektiva europiane mbetet shtysa kryesore që orienton zhvillimet politike në vendet e Ballkanit Perëndimor, përfshirë Shqipërinë.
Dy ditë më parë, edhe Komisionerja për Zgjerim e Bashkimit Europian, Marta Kos, përmendi Shqipërinë si një vend që po përparon në mënyrë të qëndrueshme në procesin e anëtarësimit. Në një intervistë për BBC News, Kos theksoi se Shqipëria po ecën mirë në procesin e integrimit evropian dhe se, gjatë mandatit të saj si komisionere, pritet të ketë anëtarësime të reja në Bashkimin Evropian nëse vendet kandidate vazhdojnë me ritmin e reformave.
Në të njëjtën intervistë, Kos renditi shtetet që po ecin më shpejt në procesin e pranimit, duke thënë: “Kemi Malin e Zi, i cili është më i avancuari. Kemi Shqipërinë, e cila po ecën mirë, si dhe Moldavinë. Pra, këto tre vende dhe ndoshta edhe Ukraina, nëse shtyjnë përpara reformat, shpresoj që gjatë mandatit tim të kemi një shtet të ri anëtar”.
Të dyja deklaratat sqaronin pritshmëritë e institucioneve europiane për progresin e kandidatëve të Ballkanit Perëndimor dhe për rolin kyç të reformave në arritjen e anëtarësimit. Metsola përqendroi vëmendjen te ndikimi i perspektivës europiane mbi zhvillimet politike rajonale, ndërsa Kos theksoi mundësinë konkrete të zgjerimit brenda mandatit të saj, nëse vendet vijojnë reformat e kërkuara.
