Denoncimi i një punonjëseje në një lokal çoi në zbulimin e një sistemi të organizimit të festave me eskorta luksi në Milano, në të cilat, sipas materialit, janë të përfshirë futbollistë të Serie A dhe të tjerë. Prokuroria e Milanos ka hapur hetim për favorizim dhe shfrytëzim prostitucioni në lokalet e natës, ndërsa përgjimet e siguruara nga hetuesit përmbajnë edhe frazën: “Është një miku im pilot i Formula 1 që vjen këtu në Milano sonte, do një tipe me pagesë”.
Në hetim është një rrjet i administruar nga një çift bashkëshortësh dhe dy bashkëpunëtorë, të cilët aktualisht ndodhen në arrest shtëpie. Sipas hetimit, aktiviteti funksiononte përmes një kompanie në Cinisello Balsamo pranë Milanos; sipas ‘La Repubblica’, kompania reklamonte në rrjetet sociale me foto dhe njoftime kërkimi për bashkëpunëtorë të rinj — vajza dhe djem me aftësi në marrëdhëniet me publikun.
Prokurorët thonë se kjo kompani shërbente si fasadë për ofrimin e shërbimeve të shtrenjta pas ngjarjeve sportive, duke rekrutuar vajza që më pas u vendoseshin klientëve në lokale milaneze dhe i shoqëronin në hotele me pesë yje për shërbime të tjera pas festës. Në paketat e ofruara përfshihej, sipas hetuesve, edhe përdorimi i oksidit të azotit përmes tullumbaceve, që nuk rezulton në testet antidoping.
Guardia di Finanza kishte sekuestruar më parë rreth 1.2 milionë euro, para të fituara nga shërbimet e ofruara për biznese dhe sipërmarrës. Sipas të përditshmes ‘Corriere Della Sera’, në aktivitetin e hetuar ishin përfshirë 10 vajza 18-vjeçe, të cilave u shkonte 50% e të ardhurave të krijuara nga këto shërbime.
Të katër të dyshuarit e përfshirë në menaxhimin e rrjetit ndodhen nën masë arresti shtëpiak ndërkohë që hetimet vazhdojnë për verifikimin e të gjitha elementeve të favorizimit dhe shfrytëzimit të prostitucionit në lidhje me aktivitetet në ambientet e jetës së natës në Milano.
