Pak ditë para pjesëmarrjes në Forumin Ekonomik Delphi (22–25 prill), kryeministri Edi Rama dha një intervistë për të përditshmen greke Kathimerini. Gjatë bisedës ai u pyet për batutën që shkaktoi reagime në Athinë zyrtare, kur gjatë samitit në Abu Dabi pati folur për prejardhjen e grekëve.
Rama shprehu keqardhje që komentet që synonin të ishin „provokuese“ dhe me humor u kthyen në çështje serioze dhe nxorrën reagime joproporcionale. Ai tha se do të duhej t’i trajtonin me më shumë butësi dhe se qëllimi i tyre nuk ishte të ofendonin, por të inkurajonin autosarkazmën. Sipas tij, nëse grekët që u mërzitën do të kishin dëgjuar pjesën tjetër të komentit, ku thoshte se shqiptaret duhet të marrin më pak seriozisht të kaluarën për t’u ndjerë më mirë, mund ta kishin kuptuar më mirë qëllimin. Rama theksoi se për Greqinë, historinë, gjuhën, letërsinë dhe kulturën ka ndjenja plotësisht pozitive dhe se e adhuron shumë atë vend. Ai shtoi se tendencat nacionaliste mund të shfaqen shpejt dhe shpesh reflektojnë mungesë pjekurie, duke sugjeruar se njerëzit duhet të buzëqeshin më shumë dhe të marrin pak më pak seriozisht njëri-tjetrin.
Kreu i qeverisë u pyet gjithashtu për prejardhjen e tij dhe për akuzat që pasuan deklaratën në Abu Dabi, se kishte përfituar nga Greqia bursë për të studiuar në Harvard gjatë kohës si kryetar bashkie i Tiranës. Rama thekoi se në fshatin Vuno të Himarës, prej nga është nëna e tij, nuk flitej greqisht dhe se, përkundër se do të ishte i lumtur dhe krenar nëse do të kishte rrënjë greke, nuk i ka dhe është krenar për rrënjët e tij shqiptare.
Ai mohoi sërish se ka marrë ndonjëherë bursë për në Harvard apo se ka studiuar atje, duke thënë se e ka vizituar universitetin falë një shoqeje të ngushtë greko-amerikane, por nuk ka qenë student i Harvardit. Rama përmendi përhapjen e shumë dezinformatave për këtë çështje.
