Policia e Dibrës finalizoi me sukses operacionin kundër falsifikimit të dokumenteve të gjendjes civile, me qëllim pajisjen e shtetasve shqiptarë me pasaporta bullgare. Operacioni, i koduar “IDENTITETI”, u ndiq rreth një muaj me metoda speciale hetimi nga Specialistët për Hetimin e Krimit Ekonomik dhe Financiar në Drejtorinë Vendore të Policisë Dibër, në bashkëpunim me Komisariatin e Policisë Kufitare Dibër dhe nën drejtimin e Prokurorisë Dibër.
Si rezultat i hetimeve, në dalje të PKK Bllatë u ndalua shtetasi E. T., 49 vjeç, banues në Sofje, Bullgari. Në kontrollin e automjetit të tij u gjetën 21 dokumente të dyshuara të falsifikuara për 21 persona të ndryshëm, dokumente që dyshohet se shërbenin për pajisjen me pasaporta bullgare. Materialet u referuan në Prokurori dhe nisi procedimi penal.
Gjithashtu, janë proceduar penalisht për shpërdorim detyre dhe falsifikim dokumentesh administratori aktual dhe ish-administratori i njësisë administrative Ostren, Bashkia Bulqizë: S., 53 vjeç, banues në fshatin Ostren, dhe M., 62 vjeç, banues në fshatin Lejçan. Sipas njoftimit të Policisë, këta dy shtetas dyshohen se gjatë ushtrimit të detyrës kanë lëshuar dhe falsifikuar dokumente të gjendjes civile për persona të ndryshëm, duke përgatitur vërtetime që pretendonin banim në njësinë administrative Ostren, të cilat më pas do t’i dërgonin në Bullgari për të siguruar pasaporta të këtij shteti.
Në ditët e fundit forca “Shqiponja” kanë hyrë në godinën e Bashkisë Bulqizë, ku dyshohet se po kërkoheshin dokumente që i shërbejnë hetimeve. Hetimet vijojnë për dokumentimin e plotë ligjor të rastit dhe për identifikimin e personave të tjerë të implikuar në këtë aktivitet të paligjshëm, me qëllim vënien e tyre para përgjegjësisë ligjore. Materialet procedurale i janë kaluar Prokurorisë pranë Gjykatës së Shkallës së Parë të Juridiksionit të Përgjithshëm Dibër për veprime të mëtejshme.
