Janë zbardhur emrat e anëtarëve të grupit të Jetmir Pepajt, të dyshuar për trafikimin e rreth 7.5 ton kokainë nga Ekuadori drejt Europës gjatë viteve 2019–2021. Gazetarja e Top Channel, Anila Hoxha, raporton se pjesëtarët e dyshuar janë: Aleks Pepaj (alias Shkëlqim Pepaj); Jetmir Pepaj (alias Jetmir Marashi); Albert Pjetri; Fatjon Marku; Anton Marku (alias Anton Tamure); Florjan Vuka (alias Vathaj); Kristjan Lleshi; Klevi Leka; Lulzim Pepa; Anton Kola dhe Ilir Lazri.
Hetimet dokumentojnë tetë raste trafiku të kokainës në sasi të mëdha gjatë periudhës 2019–2021, me veprimtari të grupit në Amerikën Latine, Belgjikë dhe Holandë. Gjykata e Posaçme ka lëshuar 11 masa sigurie, nga të cilat janë ekzekutuar tre. Në operacion janë arrestuar Lulzim Pepaj, Florian Marku dhe Anton Kola, ndërsa është lëshuar masë sigurie edhe për Jetmir Pepën, i njohur për policinë pasi në janar 2025 u shpall në kërkim lidhur me një ngjarje ku dyshohet se qëlloi me armë gjatë një koncerti festiv brenda një klubi nate në Parkun Olimpik të Tiranës.
SPAK njofton se grupi ka kryer trafikimin e rreth 7.5 tonë kokainë nga Amerika Latine drejt Europës në disa episode. Autoritetet kanë sekuestruar 232 pasuri të luajtshme dhe të paluajtshme me vlerë totale rreth 12 milionë euro. Sekuestrimet përfshijnë biznese në Tiranë, Lezhë dhe qytete të tjera, sipërfaqe toke, hotele, poste parkimi dhe apartamente, si dhe 89 makina të llojeve të ndryshme dhe llogari bankare.
Në ngarkim të anëtarëve të grupit rëndojnë akuzat për trafikim të lëndëve narkotike, pastrim të produkteve të veprës penale dhe veprimtari si grup i strukturuar. Operacioni i SPAK dhe agjentëve të BKH-së u krye në bashkëpunim me autoritetet e huaja, Europol-in dhe agjenci zbatimi në Francë, Holandë dhe Mbretërinë e Bashkuar.
