Në Vlorë është finalizuar operacioni policor i koduar “Porosia”, me të cilin u dokumentua dhe zbardh në kohë të shkurtër djegia e qëllimshme e një automjeti në pronësi të një punonjësi të Policisë. Si pasojë e zjarrvënies u përfshi nga flakët edhe një automjet tjetër. Identifikimi, kapja dhe ndalimi i autorit të dyshuar u kryen nga shërbimet policore; po ashtu u dokumentua me prova ligjore dhe porositësi i ngjarjes, i cili ndodhet me masë sigurie “Arrest në burg”. Si provë materiale është sekuestruar automjeti me të cilin lëvizte autori i dyshuar.
Nga veprimet hetimore u identifikua dhe u ndalua shtetasi A. M., 39 vjeç, banues në Vlorë, person me precedent kriminal, si autori i dyshuar i zjarrvënies. Sipas hetimeve, më datë 14.04.2026 ai ka djegur automjetin e markës “Ford C-Max”, në pronësi të punonjësit të Policisë D. P. Përhapja e flakëve ka shkaktuar dëmtime edhe në një automjet tjetër, “Mercedes-Benz”, në pronësi të shtetasit R. K. Në vazhdim të hetimeve u bë identifikimi edhe i porositësit të dyshuar, shtetasit L. H., 35 vjeç, banues në Vlorë, i cili aktualisht ndodhet me masë sigurie “Arrest në burg”.
Hetimet paraprake dyshojnë për lidhje të kësaj ngjarjeje me një operacion policor të datës 02.04.2026, gjatë të cilit shërbimet e forcës së posaçme “Shqiponja”, ndër të cilët ishte edhe punonjësi i Policisë D. P., kanë kapur në flagrancë shtetasin L. H., pasi kishte thyer masën e sigurisë “Arrest në shtëpi” të caktuar nga Gjykata për veprën penale “Prodhimi dhe shitja e narkotikëve”.
Në bashkëpunim me Prokurorinë, policia vijon veprimet hetimore për dokumentimin e plotë të kësaj veprimtarie kriminale dhe për implikimin e personave të tjerë të mundshëm. Materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprën penale “Shkatërrimi i pronës me zjarr”, kryer në bashkëpunim. Burimi: Top Channel.
