Humbja e Comos ndaj Sassuolos dhe rezultati i sfidës direkte mes Atalantës dhe Romës i rrisin ndjeshëm shanset e Juventusit për të ruajtur vendin në zonën që kualifikon në Champions League. Në klubin torinez mbretëzon optimizmi për sezonin e ardhshëm dhe për merkato, pasi të ardhurat nga pjesëmarrja në kompeticionin më të lartë evropian do t’u japin mundësi drejtuesve të ndërhynë në përmirësimin e skuadrës sipas udhëzimeve të trajnerit Spalletti.
Si prioritet shfaqet afrimi i Bernardo Silva. Portugezi ka përfunduar zyrtarisht aventurën me Manchester City dhe, në moshën 32-vjeçare, kërkon një projekt ku të mbyllë karrierën me një rol të rëndësishëm. Agjenti i tij, Jorge Mendes, po vlerëson oferta nga Evropa, MLS dhe Arabia, por në Itali si pretendente reale për kontratë mbetet vetëm Juventus, i cili mund t’i ofrojë pagën prej rreth 8–9 milionë euro në sezon që Silva kërkon. Në horizont qëndron edhe Barcelona, e cila po bën vlerësimet e saj pa nxituar për vendim.
Në mesfushë Juventus synon të shtojë si cilësi ashtu edhe sasi për t’i vendosur pranë Manuel Locatellit dhe Thuramit. Emri i parë i përmendur për një rikthim është Franck Kessie. Lista e kandidatëve përfshin edhe Leon Goretzka, Ederson, Ugarte, Schlager, si dhe dy elementë të rëndësishëm të Napolit, Stanislav Lobotka dhe André-Frank Zambo Anguissa — të cilët Spalletti i njeh mirë dhe do të preferonte t’i kishte në dispozicion. Realizimi i blerjeve të mëdha, përfshirë mundësinë e dy goditjeve simultane, lidhet drejtpërdrejt me shitjen e disa lojtarëve.
Një nga emrat që mund të dalë nga ekipi është Teun Koopmeiners; për të nuk ka shumë oferta, por klubi kërkon të mos e shesë për më pak se 30 milionë euro. Po ashtu, ka mundësi largimi për Riad Zhegrova, teksa prania e tij në fushë është ulur ndjeshëm në javët e fundit; nëse do të vijnë oferta konkrete, ai mund të largohet, përndryshe do të marrë një tjetër shans për të treguar potencialin.
