Qytetarët që lëvizin në pikat kufitare me para cash në vlerë mbi 10,000 euro do të përballen me kontrolle më të rrepta, përtej detyrimit për t’i deklaruar dhe për t’i bërë të disponueshme për kontroll autoriteteve doganore. Sipas projektligjit për “Parandalimin e pastrimit të parave dhe financimin e terrorizmit”, deklarata duhet të përmbajë të dhëna të plota të mbajtësit të parave, të pronarit dhe të marrësit të synuar të parave cash.
Kur paratë cash janë të pashoqëruara, autoriteti doganor mund të kërkojë që dërguesi ose marrësi, ose një përfaqësues i tyre, të bëjë deklaratë informuese brenda 30 ditësh. Autoriteti doganor ka të drejtë të bllokojë paratë deri sa deklarata të bëhet. Deklarata duhet të përfshijë të dhëna shteruese të deklaruesit, dërguesit dhe marrësit.
Për të verifikuar përmbushjen e detyrimit për deklarim, autoritetet doganore kryejnë kontrolle të individëve, bagazheve dhe mjeteve të transportit sipas legjislacionit në fuqi. Kur zbulohet një mbajtës me shumë cash nën pragun 10,000 euro dhe ka indikacione se paratë lidhen me veprimtari kriminale, autoritetet regjistrojnë informacionin dhe të dhënat e kërkuara si për rastet mbi kufirin. Në këto raste, dhe kur ka dyshime, autoritetet doganore mund të bllokojnë përkohësisht paratë me vendim administrativ për një periudhë deri në 30 ditë.
Pas një vlerësimi të nevojës dhe proporcionalitetit, autoritetet mund të zgjasin periudhën e bllokimit deri në 90 ditë. Nëse brenda afatit për bllokim të mëtejshëm nuk merret vendim ose përcaktohet se rrethanat nuk justifikojnë bllokimin, paratë i kthehen menjëherë personit.
Në rast mosdeklarimi autoritetet vendosin gjobë, e llogaritur si përqindje mbi vlerën: 30% e shumës mbi 10,000 euro kur totali është deri në 20,000 euro (gjoba minimale 500 euro); 40% kur totali është mbi 20,000 dhe deri në 50,000 euro; 50% kur totali është mbi 50,000 euro. Kur dyshohet se mosdeklarimi përbën vepër penale për pastrimin e parave ose financimin e terrorizmit, dosja dhe kallëzimi penal transferohen autoriteteve gjyqësore kompetente brenda 72 orësh nga verifikimi i shkeljes.
