Sot, më 16 prill 2026, shënohet 27-vjetori i eksodit të shqiptarëve të Kosovës gjatë Luftës së Kosovës, një ngjarje e dhimbshme për historinë e vendit. Rreth 800 mijë kosovarë u detyruan të braktisin shtëpitë e tyre përballë dhunës dhe kushteve të rënda jetese.
Qyteti i Kukësit dhe banorët e tij treguan një solidaritet të jashtëzakonshëm, duke hapur dyert për qindra mijëra refugjatë dhe shpesh duke ndarë edhe kafshatën e fundit. Mikpritja kuksiane mbetet një shembull i vlerave njerëzore dhe kombëtare në kohë krize. Në shenjë mirënjohjeje, Kukësi u propozua për Çmimin Nobel për Paqen, duke u bërë simbol i solidaritetit dhe dhembshurisë njerëzore.
Kjo ditë shërben si kujtesë për sakrificën dhe forcën e një populli që nuk u dorëzua. Gjatë pranverës së vitit 1999, kur mijëra shqiptarë të Kosovës kërkonin strehë, një ngjarje e veçantë ndodhi në fshatin Shtiqën të Kukësit. Arif Axhami priti në shtëpinë e tij 34 të dëbuar, duke u dhënë atyre dhomat ku jetonte me fëmijët, ndërsa ai vetë u zhvendos në katin përdhesë, aty ku mbante lopën. Ky akt humanizmi është një dëshmi e mikpritjes kuksiane në ditët më të vështira.
