Specialistët për Hetimin e Krimeve të Komisariatit të Policisë Nr. 4, në bashkëpunim me Prokurorinë, kanë arrestuar disa individë në lidhje me një zjarr që shpërtheu në një kompleks banimi në Rrugën e Dibrës. Të arrestuar janë: A. C., 54 vjeç, administrator i kompleksit, R. S., 54 vjeç, menaxhere e marketit, E. A., 66 vjeç, inxhinier drejtues, dhe A. F., 46 vjeç, administrator i subjektit që ka punuar për fasadën e kompleksit. Të gjithë ata janë akuzuar për “Shkeljen e rregullave të mbrojtjes në punë”.
Po ashtu, është nisur hetimi për S. A. dhe E. M., punonjëse në market, për “Shkatërrimin e pronës nga pakujdesia”, si dhe për A. L., 48 vjeç, pronarin e kompleksit, dhe Sh. B., 41 vjeç, kontraktorin për ndërtimin e tij.
Hetimet paraprake sugjerojnë se zjarri ka rënë në ambientin e pasmë të marketit të menaxhuar nga R. S., ku ishin grumbulluar mbeturina që nuk ishin hequr. Po ashtu, A. C. dyshohet se nuk ka kryer veprimet e nevojshme për të kontrolluar masat mbrojtëse ndaj zjarrit.
Nga zjarri janë dëmtuar 11 individë, përfshirë punonjës të DPMZSh-së dhe banorë të pallatit, të cilët po marrin mjekim në spital dhe janë jashtë rrezikut për jetën. Grupi hetimor vazhdon të punojë në vendngjarje për të përcaktuar dëmin material të shkaktuar nga zjarri.
Materialet procedurale janë dërguar në Prokurori për veprime të mëtejshme hetimore, duke vazhduar punën për të dokumentuar përgjegjësinë penale të të gjithëve të përfshirë në këtë rast.
