Ka hyrë në fuqi modeli i ri i shërbimit ushtarak në Greqi, i cili synon të përshtatë Forcat e Armatosura me kërkesat e reja të sigurisë dhe zhvillimet teknologjike. Reforma është pjesë e planit “Axhenda 2030” dhe besohet se do të forcojë nivelin e trajnimit dhe operativitetit të trupave.
Sipas modelit të ri, trajnimi bazë tani do të zgjatë 10 javë dhe do të zhvillohet në forcat e këmbësorisë, duke u përqendruar në stërvitjen praktike. Programi i trajnimit përfshin më shumë qitje dhe ushtime taktike, si dhe zhvillim aftësish të reja, përfshirë ndihmën e parë dhe përdorimin e dronëve. Pas përfundimit të fazës bazë dhe trajnimit të specializuar, shumica e ushtarëve të rinj do të vendosen në njësi operative, sidomos në zonat kufitare dhe ishujt e Egjeut Lindor.
Ndryshimet e reja përfshijnë edhe përmirësimin e kushteve ekonomike dhe të shërbimit. Kompensimi mujor do të rritet, duke arritur në 100 euro për shërbimin në zonat kufitare dhe 50 euro për pjesët e brendshme të vendit. Cilësia dhe sasia e ushqimit do të përmirësohen sipas standardeve të reja ushqimore. Rekrutët do të paraqiten në 13 Qendra Trajnimi në të gjithë vendin, dhe vendosjet do të bëhen sipas një sistemi pikëzimi që do të vlerësojë aftësitë, kualifikimet dhe preferencat e ushtarëve.
Kohëzgjatja e shërbimit ushtarak do të rritet në 12 muaj nga 9 që ishte më parë, përveç rasteve specifike si ata që janë të vetmit djem në familje ose përzgjidhen për shërbime të veçanta. Në mesin e prillit pritet të nisë një program pilot për ushtarin vullnetar të rinjve mbi 20 vjeç, përfshirë vajzat, që do të fillojnë shërbimin në fund të qershorit.
Kjo reformë synon të krijojë një ushtri më të trajnuar dhe më funksionale, në përputhje me nevojat e reja të sigurisë dhe sfidat në rajon.
