Eva Dumani u riktheu në Shqipëri pas 12 vitesh të kaluar në kampet e Sirisë, por sfida e saj nuk përfundon këtu. Ajo është një nga 39 personat e riatdhesuar, dhe tani do të përballet me procesin e riintegrimit dhe de-radikalizimit. Gjatë një interviste, Lejdi Dervishi, Drejtoreshë e Qendrës së Koordinimit kundër Ekstremizmit të Dhunshëm, theksoi se Eva do të intervistohet nga autoritetet për aktivitetin e saj në kampet siriane.
Dervishi shprehu angazhimin e institucioneve për të ofruar mbështetje për Evën, duke e trajtuar atë si një rast të veçantë. “Nuk mund të mbijetosh në ato rrethana pa trauma, por me mbështetje nga familja dhe institucionet, kemi pasur raste suksesi në rehabilitimin e individëve si Eva,” tha ajo. Ajo konfirmoi se të tjerë që janë rikthyer nga zona konflikti në Siri dhe Irak janë integruar me sukses në shoqëri.
Një dallim i rëndësishëm për Evën është se ajo nuk do të dërgohet në qendrën e specializuar në Durrës, si bashkëatdhetarët e tjerë. Dervishi e vuri në dukje se përshtatja e individëve që vijnë nga lufta e Sirisë, sidomos fëmijëve të lindur atje, është një sfidë për autoritetet shqiptare. Procesi i dokumentacionit ka qenë kompleks pasi shumë familjarë kanë humbur dokumentet e identitetit.
Fëmijët e lindur në kampet siriane dhe nënat e tyre janë detyruar të sjellin detaje mbi jetën e tyre dhe kanë kaluar teste të ndryshme, përfshirë ekzaminime ADN-je. Nga 140 persona që u larguan për në Siri më shumë se një dekadë më parë, ende 44 mbeten pa u riatdhesuar. Dervishi përfundoi duke theksuar se rehabilitimi i këtyre individëve është një proces i vazhdueshëm dhe përmban shumë sfida.
