Kushtet e motit gjatë natës së të enjtes kanë qenë relativisht të qeta në zonat malore të Bashkisë Elbasan, pa bllokime nga dëbora, megjithëse në disa zona trashësia e saj ka kaluar 30 centimetra. Strukturat përgjegjëse kanë punuar pa ndërprerje për të mbajtur akset rrugore të hapura.
Në kontrast, situata në Bashkinë Gramsh është problematike, ku dëbora dhe temperaturat e ulëta kanë shkaktuar ndërprerje të energjisë elektrike. Ekipet e riparimit janë në terren për të rikthyer furnizimin, ndërsa situata monitorohet vazhdimisht.
Në Bashkinë Elbasan, fshatrat e njësive administrative Gjinar, Gracen, Labinot Mal, Zavalinë dhe Funar kanë prani dëbore. Akset Elbasan–Gjinar dhe Elbasan–Gracen kalohen normalisht pa zinxhirë dhe nuk kanë probleme me energjinë elektrike. Rruga Elbasan–Funar gjithashtu është e kalueshme, por përdorimi i zinxhirëve rekomandohet për akset drejt fshatrave Korrë, Cërrunjë dhe Mollagjesh. Ndërkaq, aksin Elbasan–Labinot Mal dhe rrugën Elbasan–Zavalinë mund ta kalojnë vetëm mjetet me zinxhirë për shkak të temperaturave të ulëta.
Aktualisht, procesi mësimor në njësitë e prekura është pezulluar dhe do të zëvendësohet më 17 janar. Autoriteti Rrugor është aktiv në terren, duke kryer kriposjen e rrugëve.
Në lidhje me akset kombëtare, rruga Prrenjas–Qafë Thanë kalueshme normalisht, ndërsa aksi Librazhd–Peshkopi paraqitet tepër i vështirë për t’u kaluar për shkak të pranisë së akullit dhe mungesës së kriposjes. Mjetet që kalojnë në këtë aks janë shumicës foristradat e larta me zinxhirë, pasi nuk ka asnjë masë pastrimi apo kriposje të raportuar në atë zonë. Situata rrugore mbetet e vështirë dhe kërkon kujdes të veçantë nga shoferët.
