Situata në Qarkun e Korçës mbetet problematike për shkak të reshjeve të shiut, borës dhe temperaturave të ulëta. Sipas OSHEE-së, janë identifikuar probleme në linjat e tensionit të mesëm 10 kV, me 11 fidera të stakuar, nga të cilët 8 janë pjesërisht të bllokuar. Aktualisht, rreth 1,995 abonentë në zonat rurale janë pa energji elektrike, ndërsa furnizimi në zonat urbane vazhdon normalisht. Drejtoritë rajonale, përfshirë Korçën, Maliqin, Pogradecin dhe Ersekën, përballen me vështirësi, por Bilishti nuk raporton probleme. Ekipet e OSHEE-së janë në gatishmëri për riparime, veçanërisht për objektet e rëndësisë së veçantë.
Regjioni po përballet gjithashtu me përmbytje në fushën e Maliqit, ku rreth 3,600 hektarë tokë bujqësore janë nën ujë për shkak të çarjes së argjinaturës së lumit Devoll; nga reshjet e borës nuk janë raportuar problematika të ndjeshme. Në aspektin rrugor, shumica e akseve janë të hapura, por disa segmente, si ai i Qafë Plloçës–Qukës, janë të bllokuar nga inertet. Po ashtu, ndodhen bllokime në fshatin Dardhas dhe rruga e fshatit Denas mbetet e mbyllur derisa të bie niveli i ujit.
ARRSH ka kryer kriposje në akset Ersekë–Leskovik, Korçë–Ersekë, Zëmblak–Goricë dhe Bilisht–Miras për të parandaluar ngricat, me qarkullim të lejuar vetëm për automjetet me goma dimërore dhe zinxhirë. Në Bashkinë Pogradec vazhdojnë problemet në rrugën e Dardhasit, gjithashtu janë njoftuar ndërprerje të energjisë elektrike në disa njësi administrative. Një banesë në Dardhas është dëmtuar nga rrëshqitja e dheut dhe është shpallur e pabanueshme.
Në Bashkinë Devoll, situata është normalizuar pas tërheqjes së ujit, ndërsa në Kolonjë janë raportuar ngrirje të rrugëve në zonat rurale. Procesi mësimor ka rifilluar normalisht në qytete, por disa fshatra vazhdojnë të hasin probleme për shkak të kushteve atmosferike.
Strukturat e mbrojtjes civile dhe shërbimet rrugore u bëjnë thirrje drejtuesve të mjeteve që të tregojnë kujdes dhe të qarkullojnë me goma dimërore ose zinxhirë, ndërsa situata do të monitorohet derisa të normalizohet plotësisht.
