Policia Rrugore ka bërë thirrje për kujdes në qarkullim për shkak të kushteve të vështira në akset rrugore për shkak të motit të keq. Drejtori i Policisë Rrugore, Perlat Vatoci, inspektoi situatën në Rrugën e Arbërit dhe u rekomandoi drejtuesve të automjeteve që të përdorin goma dimërore dhe pajisje antirrëshqitëse.
Në njoftimin e Policisë Rrugore, Vatoci theksoi rëndësinë e përdorimit të mjeteve antirrëshqitëse dhe goma dimërore duke paralajmëruar se do të ndëshkohet çdo drejtues automjeti që nuk respekton rregullat e qarkullimit në kushte të tilla. Ai bëri apel për zbatimin rigoroz të këtyre rregullave dhe kërkoi që qytetarët të kontaktojnë shërbimet e Policisë në rast nevoje përmes numrit 112.
Për të përballuar situatën, po bashkëpunohet me firmat kontraktore për mirëmbajtjen e akseve rrugore, duke siguruar pastrimin në kohë dhe hedhjen e kripës. Shërbimet e Policisë Rrugore janë të angazhuara 100% në terren, së bashku me Patrullat e Përgjithshme dhe Forcën e Posaçme “Shqiponja”, për të ndihmuar qytetarët në zonat me probleme për shkak të motit të keq dhe për të menaxhuar trafikun rrugor, me qëllim parandalimin e aksidenteve.
Pavarësisht kushteve të vështira, forcat e sigurisë mbeten të angazhuara për të ofruar ndihmë dhe mbështetje për qytetarët dhe për të siguruar rendin dhe sigurinë gjatë këtij periodi të motit të keq.
