Prej më shumë se një jave, situata nga zjarri në Parkun Kombëtar të Lurës vijon të jetë kritike. Terreni i thyer dhe era e fortë kanë vështirësuar ndjeshëm përpjekjet e forcave të angazhuara për të izoluar vatrën, e cila mbetet ende aktive.
Flakët kanë përfshirë një zonë të thepisur të mbuluar me bimësi të rrallë, duke përfshirë drurë ahu, pisha dhe barishte. Për shkak të vështirësive në ndërhyrjen tokësore, këtë të shtunë është vënë në dispozicion një helikopter i Ministrisë së Mbrojtjes, që ka ndërhyrë nga ajri për të shuar flakët në zonat më të paarritshme.
Sipas informacioneve të fundit nga terreni, janë dy vatra aktive që vijojnë të përhapen të ndihmuara nga era. Pavarësisht përpjekjeve intensive, zjarri po përparon në mënyrë të rrezikshme, duke rrezikuar një sipërfaqe gjithnjë e më të madhe të parkut.
Në operacion janë angazhuar forca të Mbrojtjes nga Zjarri dhe Shpëtimit (MZSH), të Administratës së Zonave të Mbrojtura (ADZM), punonjës të njësisë administrative Lurë, forca vullnetare si dhe efektivë të Forcave të Armatosura. Puna është përqendruar në izolimin e vatrave dhe frenimin e përhapjes.
Ende nuk ka një përllogaritje të saktë të dëmit, por vlerësimet paraprake flasin për disa hektarë pyje dhe sipërfaqe me bimësi të djegura. Autoritetet janë të shqetësuara për ndikimet afatgjata në mjedisin e parkut, i cili ka vlera të rëndësishme natyrore në nivel kombëtar.
