GREQI- Ministri i Imigracionit dhe Azilit, Makis Voridis, si dhe Zëvendësministrat e Punëve të Jashtme, Tasos Hatzivassiliou, Zhvillimit Rural, Dionysis Stamenitis dhe Qeverisjes Dixhitale Christos Boukoros, kanë paraqitur dorëheqjen nga postet ministrore.
Largimet e tyre nga detyra vijnë pas skandalit me fondet e keqmenaxhuara të BE për fermerët grekë, të trajtuara në 6 vitet e fundit si subvencione të paligjshme. Dorëheqjet e tyre u pranuan menjëherë nga Kryeministri Kyriakos Mitsotakis. Sekretari i Përgjithshëm i Zhvillimit Rural Giorgos Stratakos gjithashtu dha dorëheqjen nga pozicioni i tij.
Personat që do të zëvendësojnë anëtarët e dorëhequr të qeverisë do të vendosen nga kryeministri gjatë fundjavës kur ai do të jetë në Hania dhe njoftimet përkatëse pritet të bëhen pas mbledhjes së kabinetit, të hënën në mëngjes.
SKANDALI
Pjesë nga transmetimi i dosjes voluminoze të çështjes së OPEKEPE-s, të cilat u nxorrën në dritë nga mediat greke, përmbajnë indikacione për përfshirjen e politikanëve dhe ministrave përkatës në çështjen famëkeqe. Sipas dosjes së çështjes së Prokurorëve Evropianë, ish-presidenti i OPEKEPE-s, Grigoris Varras, e kishte informuar dy herë Ministrin Makis Voridis me anë të letrave në lidhje me parregullsitë në sistemin e ndihmës financiare.
Dy figura kyçe, Dimitris Melas dhe Athanasia Reppa (aktualisht në gjyq për raste individuale të OPEKEPE), u përpoqën të bllokonin auditimet nga grupi Varras. Prokurorët Evropianë theksojnë se rezultati i kësaj mosmarrëveshjeje të brendshme ishte “dorëheqja” e Varras nga ministri i atëhershëm Makis Voridis.
Për më tepër, kjo tregon përpjekjen sistematike të Greqisë, nëpërmjet personave të përfshirë, për të ndryshuar artificialisht shpërndarjen hapësinore dhe zonat e deklaruara, me qëllim shmangien e kontrolleve të mekanizmave evropianë të kontrollit.
Hetimi i Zyrës së Prokurorit Publik Evropian ka të bëjë, ndër të tjera, me akuzat se gjatë periudhës 2019-2022, një numër i konsiderueshëm individësh e kanë prezantuar veten në mënyrë të rreme si fermerë të rinj që ishin pronarë ose qiramarrës të tokave të mëdha bujqësore/blegtorale me qëllim që të merrnin pagesa/subvencione nga rezerva kombëtare.
Këto kullota shpesh ndodheshin larg vendbanimit aktual të aplikantëve dhe shumica prej tyre më parë ishin toka publike, të dhëna vetëm për kullotje për ata pa tokë. Në vitet në vijim deri në vitin 2024, ata dyshohet se kanë paraqitur deklarata të pasakta të bagëtive dhe kanë kërkuar ndarjen e kullotës publike përkatëse me qëllim aktivizimin dhe ruajtjen e të drejtave të pagesës.
