TIRANË- Seanca gjyqsore për lirimin me kusht për ish-deputetin demokrat Ervin Salianji është mbajtur ditën e sotme. Sipas avokatit të Salianjit, Ledio Braho raporti i vlerësimit nga IEVP Fier ka ardhur pozitiv.
Por sipas procedurës u njoftua shërbimi i provës, që duhet të paraqesë raportin e saj deri në datën 8 korrik. Pas këtij raporti do të vendoset mbi pranimin ose rrëzimin e kërkesës për lirim me kusht nga ish-deputeti Ervin Salianji.
Ervin Salianji është dënuar me një vit burg për dosjen “Babale”. Ai është dënuar së bashku me Albert Veliun, që pritet të vuaj dënimin me 10 muaj burg si dhe gazetarin Jetmir Olldashi me 100 orë punë komunitare. Shkalla e parë vendosi që Salianji të dënohet për kallëzim të rrëmë, në lidhje me një denoncim që ka bërë për vëllanë e ish-Ministrit të Brendshëm Fatmir Xhafa, Agron Xhafa. Në audio-përgjimin që publikoi Salianji, thuhej se Agron Xhafa ishte pjesë e një rrjeti kriminal të trafikut të lëndëve narkotike.
