TIRANË- Seanca gjyqësore në ngarkim të të pandehurve të dosjes 5D është shoqëruar me tensione. Përplasjet dhe debatet kanë nisur pas një kërkese për gjykim të shkurtuar.
Denion Bogdani, avokati i të pandehurit Redi Molla, ka kërkuar të mos nisë shqyrtimi gjyqësor i çështjes nëse më parë nuk merret një vendim për këtë kërkesë. Edhe avokatët e të pandehurve të tjerë Ermir Beta dhe Ardian Leka kërkuan shtyrjen e seancës për të njëjtin motivacion.
Ndërkohë avokatja Evi Sheri, e të pandehurit Taulant Tushe, ndryshe nga të tjerët ka kërkuar që seanca të mos të shtyhet, duke shkaktuar kështu debat mes tyre. Prokurori i çështjes, Klodian Braho deklaroi se kërkesa nuk ka pse të shërbejë si arsye për t’u shtyrë seanca.
Më 2 korrik të 2024 SPAK i komunikoi akuzat “korrupsion pasiv” dhe “mosdeklarim të pasurisë” Redian Mollës dhe Mariglen Qatos, ndërsa Taulant Tushes i komunikoi akuzën “shkelje e barazisë në tendera”. Tre ish-drejtorët u arrestuan në muajin mars të vitit të kaluar me urdhër të Prokurorisë së Posaçme Antikorrupsion, në kuadër të hetimeve për dosjen “5D”. Ata u lanë në masën “arrest në burg”, ndërsa pesë persona të tjerë në masën “detyrim paraqitje”, konkretisht Enton Punavija, Julian Zanaj, Albano Janku, Nestor Muhamellari, Deborah Keçi dhe Englatina Zere. Sipas SPAK, Qato dhe Molla janë pronarë de facto të kompanisë “5D”, e cila sipas hetimeve, ka rezultuar fituese në disa tendera pranë bashkisë. Bëhet fjalë për 11 procedura tenderimi në harkun kohor të 6 viteve, nga 2016 deri në 2022. Kompania njihet dhe me dy emra të ndryshëm “Igor Electric” dhe “Vas construcion”.
