Një ngjarje e rëndë tronditi një ditë më parë sërish vendin, ku në fshatin Guci e Re, në Shkodër, u vra me 6 plumba 20-vjeçari Pavlin Preka. E teksa kanë kaluar rreth 20 orë nga kjo ngjarja Policia e Shkodrës ende nuk ka një pistë.
Burime për mediat bëjnë me dije se autoritetet deri më tani kanë shoqëruar rreth 20 persona, të cilët janë komshinj, shtetas që kanë pasur komunikim me viktimën por edhe persona të tjerë të cilët njihen në zonë si problematikë.
Sipas të njëjtave burime mësohet se ata janë marrë në pyetje, mirëpo deri më tani nuk ka asnjë autor të dyshuar.
Ashtu si dhe bëmë me dije më herët, Pavlin Preka jetonte mes Dukagjinit dhe fshatit Guci e Re, bashkë me babain dhe vëllain e tij. 20-vjeçari kishte 4 ditë që kishte shkuar në banesën ku dhe u gjet i vrarë.
Ngjarja e rëndë ndodhi pasditen e së enjtes. Ishte xhaxhai i 20-vjeçarit, Nikollë Preka personi i cili e gjeti nipin e tij të vrarë. Viktima jetonte i vetëm në shtëpi ndërsa ushqehej tek familja e xhaxhait që e kishte shumë afër. Pasi e kishin telefonuar disa herë për të ngrënë drekën, i riu nuk i ishte përgjigjur dhe si rjedhojë xhaxhai i tij kishte shkuar tek banesa duke menduar se mos ishte në gjumë.
Por, në atë moment e gjeti 20-vjeçarin të shtrirë në oborrin e banesës të “bërë shoshë” nga plumbat. Menjëherë ai telefonoi policinë, të cilët mbërritën në vendin e ngjarjes dhe filluan hetimet.
Ndërkohë, vlen të theksohet se komshinjtë kanë deklaruar para grupit hetimor se nuk kanë dëgjuar krisma, çka çon në dyshimin se vrasja mund të jetë kryer me pistoletë me silenciator.
