Çdo ditë qytetarët paguajnë taksa për mjedisin, shpesh pa e kuptuar, të inkorporuara në faturat e karburantit, taksën e qarkullimit, tarifat e pastrimit të bashkisë dhe faturat e energjisë. Sipas INSTAT, në vitin 2024 arkëtimet nga taksat mjedisore arritën 66.2 miliardë lekë (rreth 695 milionë euro). Pjesa më e madhe, 82% ose 54 miliardë lekë, vjen nga taksat e energjisë, kryesisht akciza mbi karburantet që paguhen në furnizimin e makinave. Taksat e transportit — për kolaudimin, regjistrimin e mjeteve dhe taksën vjetore të automjetit — zënë 13% të totalit, ose 8.6 miliardë lekë në 2024, me rritje krahasuar me vitin e mëparshëm. Taksat për ndotjen që reflektohen në tarifat e mbetjeve dhe për përdorimin e burimeve natyrore përbëjnë respektivisht 4.7% dhe 0.08% të të ardhurave.
Taksat mjedisore janë konceptuar si instrument ekonomik për kontrollin e ndotjes dhe menaxhimin e burimeve natyrore, me qëllim ndikimin e sjelljes së bizneseve, prodhuesve dhe konsumatorëve. Megjithatë, raportet vjetore të Agjencisë Kombëtare të Mjedisit për të njëjtin vit tregojnë se shkallët e ndotjes janë rritur ndjeshëm. Përkeqësim është konstatuar në lumenj, veçanërisht në lumin e Tiranës, Ishëm dhe Gjanica. Mbetjet urbane u rritën ndjeshëm, duke arritur 870 mijë tonë në 2024, ndërsa raporti ngre shqetësimin për rritjen e sipërfaqeve të djegura nga zjarret.
Po ashtu vihet re shtim i pranisë së disa ndotësve të ajrit, të lidhur edhe me cilësinë e karburantit. Ndërsa arkëtohen më shumë të ardhura nga taksat e gjelbra dhe rritet mbledhja në buxhetin e shtetit, niveli i ndotjes vazhdon të rritet, duke ngritur pyetjen nëse këto të ardhura po shndërrohen në investime reale apo mbeten vetëm në letër.
