Autoritetet franceze kanë aktivizuar një plan evakuimi me përmasa të paprecedenta në gadishullin Cap Ferret, në jugperëndim të vendit, ndërsa zjarret që kanë përfshirë rajonin vazhdojnë të përhapen me shpejtësi. Flakët kanë djegur mbi 125 mijë hektarë, një sipërfaqe më e madhe se ajo e Parisit, dhe gjatë dy ditëve të fundit janë evakuuar rreth 44 mijë banorë dhe turistë.
Guvernatorja e rajonit Gironde, Sophie Brocas, tha se operacioni i evakuimit po zhvillohet në mënyrë të organizuar. Banorët u njoftuan përmes mesazheve emergjente në telefonat celularë dhe u kërkua të largoheshin menjëherë nga zonat e rrezikuara. Njoftimet u dërguan sipas sektorëve dhe fshatrave për të shmangur bllokimin e trafikut, ndërsa autoritetet orientuan përdorimin e rrugës provinciale D106, e vetmja dalje rrugore nga gadishulli.
Për ata pa mjete transporti u aktivizua edhe evakuimi nga deti: bashkia e Arcachon njoftoi se më shumë se 800 persona janë larguar me anije nga Cap Ferret dhe qindra të tjerë kanë mbërritur në skelë me bagazhet e tyre. Këshilltari bashkiak i Cap Ferret, David Laforgue, deklaroi se procesi i evakuimit po zhvillohet pa probleme dhe se autoritetet kishin organizuar një simulim të ngjashëm në vitin 2025, pas zjarreve shkatërruese të vitit 2022.
Plani i evakuimit, i miratuar në korrik 2023, parashikon prioritete për personat më të cenueshëm dhe aktivizimin e evakuimit masiv detar në rast se rruga D106 bllokohet nga flakët, për të shmangur izolimin e banorëve në gadishull. Gjatë sezonit veror Cap Ferret pret deri në 150 mijë persona, çka rrit kompleksitetin e operacionit të largimit.
Sipas planit të emergjencës, në rast nevoje mund të angazhohen të paktën 27 anije pasagjerësh dhe 33 autobusë për transportimin drejt qendrave të pritjes në Arcachon. Kapaciteti i parashikuar është për të larguar rreth 12 mijë persona gjatë 24 orëve të para dhe deri në 14 mijë persona çdo ditë pasuese.
