Një ngjarje tragjike ka ndodhur në fshatin Peshtan Bregas, Njësia Administrative Frakull, Bashkia Fier, ku një 36-vjeçar, Hamza Duraj, ka humbur jetën gjatë punës në tokat bujqësore. Sipas informacioneve nga vendi i ngjarjes dhe nga Drejtoria Vendore e Policisë Fier, Duraj kishte dalë për të punuar me frezë kur dyshohet se është penguar aksidentalisht, duke rënë në tokë. Mjeti bujqësor ka kaluar sipër trupit të tij, duke shkaktuar plagë fatale dhe vdekje të menjëhershme.
Trupi i tij është gjetur nga familjarët, të cilët kishin filluar të shqetësoheshin pasi Hamza nuk po u përgjigjej thirrjeve telefonike. Ata kanë njoftuar menjëherë shërbimet e emergjencës, dhe në vendngjarje kanë arritur policia dhe ambulanca. Ndonëse 36-vjeçari është transportuar drejt Spitalit Rajonal të Fierit, ai kishte ndërruar jetë që në vendin e ngjarjes.
Aktualisht, trupi ndodhet në morgun e Spitalit Rajonal Fier, ku pritet të kryhet ekspertiza mjeko-ligjore. Pas përfundimit të procedurave, familjarët do të tërheqin trupin për t’i dhënë atij një ceremoni mortore nesër.
Policia po punon për të zbardhur rrethanat e aksidentit tragjik. Ngjarja ngre shqetësime mbi sigurinë e punëtorëve në bujqësi dhe nevojën për masa më të forta të mbrojtjes gjatë punës në tokë.
