Amnistia penale, e cila dha lirinë e menjëhershme për 541 persona, nuk rezultoi e suksesshme për të gjithë të liruarit për t’i shmangur problemet me ligjin. Mes përfituesve ishte 36-vjeçari Mariglen Gashi, i dënuar më parë për vjedhje, i cili u lirua nga burgu por u arrestua sërish brenda dy ditësh për të njëjtën vepër penale.
Sipas hetimeve, menjëherë pas lirimit Gashi dyshohet se iu rikthye aktivitetit kriminal. Më 16 dhe 17 korrik ai akuzohet se kreu dy vjedhje në fshatin Plug të Lushnjës. Fillimisht, në një dyqan dyshohet se vodhi dy bateri automjetesh. Një ditë më pas, në orët e para të mëngjesit, dyshohet se hyri në një lokal në të njëjtin fshat, ku mori një shumë parash dhe një laptop. Para se të largohej, policia thotë se ai dyshohet se i vuri zjarrin lokalit, duke shkaktuar dëme të shumta materiale.
Gjurmët e lëna në vendngjarje dhe veprimet hetimore çuan Policinë në identifikimin dhe arrestimin e Mariglen Gashit. Rastet e tilla rikthejnë në vëmendje pyetjen mbi efektivitetin e amnistisë penale për personat me precedentë kriminalë, pasi në këtë rast një i dënuar për vjedhje, i liruar për shkak të këtij mekanizmi ligjor, dyshohet se kreu sërish të njëjtën vepër dhe e shoqëroi atë me një akt zjarrvënieje.
