Që nga fillimi i mandatit të tij të dytë është rihapur debati mbi aftësinë e Donald Trump për të ushtruar detyrën e presidentit. Në një artikull në British Medical Journal, 30 mjekë amerikanë deklarojnë se vërejnë rënie të aftësive njohëse dhe sjellje impulsive tek Trump, dhe e përshkruajnë atë si një “rrezik të qartë dhe të menjëhershëm” për botën, duke kërkuar shkarkimin e tij nga detyra.
Ekspertët, përfshirë neurologë, psikiatër dhe psikologë, rendisin shenja që sipas tyre tregojnë përkeqësim të aftësive mendore: fjalime të paqarta, kalime të papritura mes temash, harresa për emra, kontradikta brenda deklaratave të shkurtra kohore, lodhje e dukshme dhe ecje e pasigurt. Si shembull përmendet një fotografi të Reuters ku Trump shfaqej me sytë e mbyllur gjatë një takimi në Oval Office; Shtëpia e Bardhë e përshkroi atë si “pulitje sysh”, ndërsa kritikët e panë si humbje përqendrimi. Raportohet gjithashtu se ai dremit shpesh në mbledhje kabineti. Shtohet edhe sjellja impulsive, përfshirë kërcënime të ashpra në konflikte ndërkombëtare, si dhe fotografi me duar të mavijosura.
Mjekët pohojnë gjithashtu praninë e “bindjeve megalomane dhe deluzionale”. Reagime të forta shkaktoi një imazh i krijuar me inteligjencë artificiale që e paraqiste Trumpin si Jezus; pas kritikave, ai e fshiu postimin dhe tha se mendoi se dukej si mjek. Po ashtu vihet në dukje se Trump shpesh përmend se ka bërë “teste të vështira inteligjence”, por bëhet fjalë për testet MoCA, që janë procedura të thjeshta për zbulimin e hershëm të demencës dhe jo vlerësime të inteligjencës.
Megjithatë, ekspertët paralajmërojnë kundër vendosjes së diagnozave nga distanca, sipas rregullit Goldwater, që e konsideron të paetikë diagnostikimin pa ekzaminim të drejtpërdrejtë. Ata nënvizojnë se mungesa e një diagnoze nuk përjashton shqetësimet dhe kërkojnë një “ekzaminim klinik urgjent”. Një kontroll i tillë pritet në fund të majit në spitalin ushtarak Walter Reed; transparenca e rezultateve mbetet e paqartë. Debati mbi gjendjen mendore dhe fizike të Trumpit është bërë çështje politike dhe pritet të vazhdojë.
