Në kuadër të aktiviteteve për parandalimin dhe goditjen e kultivimit, prodhimit dhe shitjes së lëndëve narkotike, Forca e Posaçme Operacionale ndaloi një automjet tip “Nissan” në aksin rrugor “Kallmet – Ungrej”, i drejtuar nga shtetasi Anton Toli. Gjatë kontrollit të automjetit, u zbulua një sasi lënde e dyshuar narkotike Cannabis Sativa, e cila dyshohet se po transportohej me qëllim shitjeje.
Pas veprimeve të nevojshme procedurale, specialistët e Seksionit për Hetimin e Narkotikëve arrestuan në flagrancë shtetasin A. T., një 29-vjeçar nga Lezha, për veprën penale “Prodhimi dhe shitja e narkotikëve”. Materialet që lidhen me këtë rast iu referuan Prokurorisë pranë Gjykatës së Shkallës së Parë në Lezhë për procedime të mëtejshme.
