Një 24-vjeçar në zonën e Kombinatit në Tiranë u arrestua pasi lokali që ai shfrytëzonte, përveç shërbimit të barit, përdorej edhe si pikë për vënien e basteve sportive. Kontrolli dhe pranga u bënë në kuadër të operacionit të koduar “Fati i lojërave”, njoftoi policia.
Specialistët e Hetimit të Krimeve të Komisariatit Nr. 6, gjatë kontrolleve në lokale dhe ambiente të tjera, konstatuan se në një prej lokaleve në zonën “Kombinati” po zhvilloheshin bastet sportive përmes celularit. Shtetasi që kishte në përdorim ambientin, i identifikuar si Xh. Xh., 24 vjeç, u vu në pranga dhe i sekuestrua celulari.
Nga verifikimet në pajisjen e tij, policia gjeti faqe aktive të kompanive të basteve, me të cilat i riu operonte për vënien e basteve sportive. Materialet procedurale të përgatitura në lidhje me rastin iu referuan Prokurorisë së Tiranës për veprime të mëtejshme.
Policia njofton se kontrollet kundër kësaj veprimtarie vijojnë në të gjithë territorin e qarkut, pjesë e vijimit të operacionit “Fati i lojërave”, me qëllim evidentimin dhe goditjen e rasteve të përshtatjes së ambienteve për organizim të kundërligjshëm të lojërave të fatit. Procedurat e tjera hetimore dhe administrative përkatëse do të kryhen sipas kërkesave të Prokurorisë.
(Njoftim i Policisë; Top Channel)
