Një rast i pazakontë u zbulua në Aeroportin Ndërkombëtar të Kolombos, ku 22 murgj janë arrestuar pasi në bagazhet e tyre u gjetën rreth 110 kilogramë kanabis. Sasia ishte fshehur në mure të rreme të krijuara posaçërisht brenda valixheve, ndërsa secili murg mbante afërsisht 5 kilogramë të llojit të fuqishëm “Kush”. Murgjit, shumica studentë, po ktheheshin nga një udhëtim katër-ditor në Tajlandë, udhëtim që dyshohet të ketë qenë i financuar nga një donator i panjohur.
Autoritetet arrestuan edhe një murgu tjetër, i dyshuar si organizator i udhëtimit, i cili nuk kishte marrë pjesë në shkëmbimin e bagazheve dhe u gjet më vonë në një periferi të Kolombos. Hetimet paraprake tregojnë se organizatori kishte bindur murgjit se valixhet përmbanin “dhurime” që do t’u merren personave të tjerë pas mbërritjes, dhe po shqyrtohet mundësia që disa prej murgjve të mos kenë qenë të vetëdijshëm për përmbajtjen e vërtetë.
Telefonat celularë të të arrestuarve u sekuestruan dhe po analizohen nga agjencitë kompetente. Sipas Agjencisë së Zbatimit të Ligjit për Drogat, në pajisjet e sekuestruara janë gjetur foto dhe video nga udhëtimi në Tajlandë, ku murgjit shfaqen në aktivitetet turistike dhe në momente relaksi. Droga ishte fshehur mes furnizimeve shkollore dhe ëmbëlsirave, çka hetuesit e konsiderojnë si tregues të një plani të strukturuar për të kaluar mallin.
Të 22 murgjit u paraqitën para gjykatës dhe u lanë në paraburgim për shtatë ditë, ndërsa hetimet vijojnë për të përcaktuar rrjetin e përfshirë, burimin e drogës dhe rolin e të arrestuarit të dytë. Autoritetet theksuan se ky është rasti i parë në vend ku një numër kaq i madh murgjish përfshihet në një rast trafiku droge përmes aeroportit, dhe po vazhdojnë veprimet hetimore për të sqaruar të gjitha rrethanat.
