Evakuimi i pasagjerëve të anijes turistike MV Hondius dhe rikthimi i tyre në vendet ku jetojnë ka ngritur shqetësime për përhapjen e mëtejshme të hantavirusit, por zyrtarët amerikanë të shëndetësisë e kanë cilësuar rrezikun si të ulët. Lajmi u bë publik pasi një grua franceze dhe një shtetas amerikan, të evakuuar nga anija, dolën pozitivë me hantavirus. Shtetasja franceze është në gjendje të rëndë dhe trajtohet në një njësi të specializuar për sëmundje infektive në Paris. Pasagjeri amerikan nuk ka shfaqur simptoma dhe është karantinuar në Nebraska, së bashku me turistët e tjerë amerikanë që ndodheshin në anijen ku shpërtheu virusi.
“Siguria e pacientëve është përparësi kryesore”, thanë zyrtarët e shëndetësisë në Shtetet e Bashkuara, duke sqaruar se simptomat e hantavirusit janë të ngjashme me ato të gripit, si ethe, dhimbje trupi, marramendje, kollë, të përziera dhe diarre. Të gjithë pasagjerët e MV Hondius, me kombësi nga vende të ndryshme të botës, do të qëndrojnë në karantinë të detyrueshme dhe nën monitorim mjekësor.
Organizata Botërore e Shëndetësisë (OBSH) paralajmëroi se është e mundur të shfaqen raste të reja në javët në vijim, duke sqaruar se kjo pritet për shkak të periudhës së gjatë të inkubacionit të virusit dhe jo për shkak të transmetimit në komunitet. OBSH rekomandon izolim 42-ditor dhe monitorim të përditshëm për personat që kanë qenë në kontakt me të infektuarit. “Kjo është arsyeja pse duhet të qëndrojmë vigjilentë dhe të sigurohemi që në shenjat dhe simptomat e para njerëzit të izolohen dhe të ketë kujdes për ta”, tha OBSH.
Si masë paraprake, autoritetet po zbatojnë karantinimin dhe monitorimin e pasagjerëve dhe kontakteve të tyre, ndërsa rastet e konfirmuara vazhdojnë të trajtohen në njësi të specializuara shëndetësore. Zyrtarët amerikanë dhe OBSH po ndjekin situatën duke u fokusuar në evidentimin e rasteve të reja dhe në mbrojtjen e shëndetit publik.
