Një denoncim i fortë ka mbërritur në redaksinë e Timoni.al, ku një person që prezantohet si inspektor i zonës ngre akuza të rënda ndaj shefit të Komisariatit nr.4, Feliks Hoda, duke e akuzuar për ndërhyrje të drejtpërdrejta në favor të ndërtimeve pa leje dhe ryshfete në këmbim të heshtjes së institucioneve.
Sipas denoncuesit, pas konstatimit të sotëm të tre kateve pa leje në një pallat të sekuestruar, inspektorët përballen vazhdimisht me presione dhe pengesa në ushtrimin e detyrës së tyre.
Në mesazhin e dërguar për redaksinë thuhet se shefi i Komisariatit nr.4 telefonon personalisht inspektorët për t’u kërkuar që të “bëjnë një sy qorr” ndaj ndërtimeve pa leje, ndërsa pretendohet se për çdo rast përfiton shuma të majme parash.
“Ky shef komisariati në dukje i suksesshëm nuk është asgjë më shumë se kupola e policisë që sapo u largua, një gjobaxhi i mirëfilltë që merr 3 mijë euro për ndërtimet pa leje dhe mburret se merr përsipër çdo institucion”, thuhet në denoncim.
Denoncuesi kërkon anonimatin, duke shprehur mosbesimin ndaj institucioneve dhe duke deklaruar se media mbetet e vetmja shpresë për të nxjerrë në dritë këtë fenomen që, sipas tij, po shkatërron ligjin dhe po favorizon paligjshmërinë në kryeqytet.
Akuza të tilla, nëse provohen, hedhin hije të rënda mbi funksionimin e strukturave të policisë dhe lidhjet e mundshme me ndërtimet pa leje, një plagë që prej vitesh rëndon mbi qytetet shqiptare.
Tashmë pritet reagimi i Policia e Shtetit dhe institucioneve përgjegjëse për të verifikuar këto pretendime tronditëse.
