FIFA ka zbuluar rregullat e reja për Botërorin 2026, duke përfshirë ndryshime të rëndësishme në menaxhimin e lojës. Një prej novacioneve është implementimi i zëvendësimeve të shpejta; futbollisti që zëvendësohet do të ketë vetëm 10 sekonda për t’u larguar nga fusha. Nëse kalon këtë kohë, lojtari i ri do të duhet të presë një minutë për të hyrë, duke lënë skuadrën me vetëm 10 futbollistë për ato sekonda.
Rregullat e reja përfshijnë gjithashtu një sistem kontrolli të kohës për rinisjet e lojës, me një timer prej 5 sekondash për rivëniet anësore dhe ato nga vija fundore. Nëse nuk respektohet ky afat, zotërimi i topit do t’i kalojë skuadrës kundërshtare.
Për sa i përket trajtimit mjekësor, një futbollist që merr kujdes në fushë duhet të dalë dhe të presë 1 minutë për t’u rikthyer, përveç rasteve kur lëndimi i shkaktuar ndodh nga një faull që dënohet me karton të verdhë. Kjo masë synon të sigurojë që lojtarët të trajtohen siç duhet pa vonesa të gjata në lojë.
Një tjetër ndryshim është zgjerimi i zonave të ndërhyrjes së VAR, i cili do të ketë fuqinë të verifikojë episodet që lidhen me kartonët e dytë të verdhë, si dhe vendimet e gabuara për goditjet e këndit. Kjo do të ndihmojë në rritjen e saktësisë së vendimeve gjatë ndeshjeve.
Lidhur me komunikimin në fushë, rregulli i ri konfirmon se vetëm kapiteni i skuadrës ka të drejtë t’i afrohet arbitrit. Lojtarët e tjerë që rrethojnë gjyqtarin rrezikojnë të ndëshkohen me karton të verdhë, duke promovuar një sjellje më të disiplinuar në fushë dhe përmirësuar komunikimin midis arbitrit dhe skuadrave.
Këto rregulla synojnë të modernizojnë ecurinë e lojës, qoftë për të ruajtur dinamikën, qoftë për të rritur drejtësinë në vendimet e gjyqtarëve, dhe priten me interes nga klube, lojtarë dhe tifozë.
