Federata e Futbollit të Indonezisë ka njoftuar ndërprerjen e bashkëpunimit me Patrick Kluivert, trajnerin e kombëtares, i cili e mori drejtimin e skuadrës në janar me një kontratë dyvjeçare. Kluivert, legjendë e Barcelonës dhe Ajaxit, kishte si objektiv dërgimin e Indonezisë në Botërorin e parë që nga pavarësia e vendit në 1945.
Nën menaxhimin e Kluivert, ekipi arriti për herë të parë në raundin e katërt të kualifikimeve aziatike. Megjithatë, humbjet ndaj Arabisë Saudite dhe Irakut javën e kaluar shuan shpresat për pjesëmarrjen në këtë turne me 48 skuadra. Rezultati vendimtar ndodhi në Jeddah, ku Indonezia humbi 1-0 ndaj Irakut, dhe dy lojtarë u ndëshkuan me karton të kuq pas ndeshjes.
Pas këtij dështimi, federata reagoi me shpejtësi duke konfirmuar largimin e Kluivert dhe stafit të tij teknik me marrëveshje të ndërsjellë. Në një deklaratë zyrtare, federata theksoi se ky veprim ishte pjesë e një procesi vlerësimi të programit të zhvillimit të futbollit kombëtar.
Kluivert zëvendësoi Shin Tae-yong, trajneri korean i cili ishte shkarkuar nën rrethana të diskutueshme. Gjatë tetë ndeshjeve me Indonezinë, Kluivert regjistroi tre fitore, katër humbje dhe një barazim, përfshirë humbjen e rëndë 5-1 në debutimin e tij ndaj Australisë dhe një tjetër 6-0 ndaj Japonisë.
Para këtij angazhimi, Kluivert kishte drejtuar Kurasao-n dhe pati një periudhë të shkurtër me Adana Demirspor në Turqi. Gjatë karrierës si futbollist, ai fitoi dy tituj në Eredivisie dhe një Champions League me Ajaxin, si dhe luajti për skuadra të njohura si Milano, Barcelona dhe Newcastle. Më vonë, ai pati sukses si asistent i Louis van Gaal me përfaqësuesen holandeze që arriti vendin e tretë në Botërorin 2014.
Tre nga fëmijët e tij janë futbollistë profesionistë, përfshirë Justin Kluivert, i cili aktualisht luan për Bournemouth në Premier League.
