George Russell dhe Kimi Antonelli do të qëndrojnë në skuadrën e Mercedes në Botërorin e Formula 1 deri në vitin 2026. Njoftimi është bërë nga skuderia gjermane përmes kanaleve të saj zyrtare, duke përforcuar angazhimin e tyre për të dy pilotët. Russell, 27 vjeç, do të përjetojë sezonin e tij të tetë me Mercedes, teksa Antonelli do të hyjë në vitin e tij të dytë.
Ky njoftim u bë pikërisht në javën e Çmimit të Madh të SHBA-së, që do të mbahet në Austin të Teksasit. Të dy pilotët janë produkte të akademisë së Mercedes, duke iu bashkuar kësaj strukture në vitet 2017 dhe 2019. George Russell është një nga pilotët më të njohur të kësaj skuadre, me një karrierë të theksuar që përfshin titujt në GP3 dhe Formula 2, para se të debutonte në Formula 1. Pas tre viteve te Williams, ai ka siguruar pesë fitore që nga kalimi te Mercedes.
Ndërkaq, Andrea Kimi Antonelli ka një rekord mbresëlënës në kategoritë e poshtme, duke fituar disa kampionate të Formula 4 dhe titullin në Formula Regional. Ai realizoi debutimin e tij në Formula 1 këtë vit, duke u bërë piloti i tretë më i ri në histori që ngjitet në podium. Antonelli është pritur me shumë entuziazëm, duke u konsideruar një prej debutuesve më të mirë të sezonit.
Ky angazhim i gjatë nga Mercedes tregon për besimin e skuderisë në talentin e të dy pilotëve, të cilët përfaqësojnë të ardhmen e ekipit në përpjekjet për të arritur sukses në botën e Formula 1.
