Sipas raportimeve nga vrojtuesit pyjorë, situata e zjarreve në Bashkinë Shkodër ka marrë një kthesë pozitive. Vatrat e zjarreve të shfaqura së fundit janë shuar dhe aktualisht nuk ka zjarre aktive në zonat pyjore të kësaj bashkie.
Në kënetën e Domit, e cila është në Njësinë Administrative Velipojë, punonjësit e Drejtorisë përkatëse kanë konfirmuar se nuk ka flakë, vetëm tym, që nuk përbën rrezik për përhapje. Megjithatë, në fshatin Xath, në Njësinë Administrative Blerim, situata është më e ndërlikuar. Atje, vijon një operacion i gjerë për të përballuar një zjarr masiv në malet e Xathit. Bashkia është angazhuar maksimalisht, duke mobilizuar të gjitha kapacitetet e saj njerëzore dhe logjistike, me mbështetje të forcave të ushtrisë dhe komunitetit lokal.
Një helikopter ka ardhur për ndërhyrje ajrore, i cili do të ndihmojë në izolimin e vatrave aktive. Terreni i vështirë e komplikon punën, por pritet që ndihma ajrore të kontribuojë në neutralizimin e situatës. Në bashkitë përreth, si Vau Dejës, Pukë dhe Malësi e Madhe, nuk raportohet për probleme të emergjencave civile.
Strukturat e Emergjencave Civile, nën drejtimin e Prefektit të Qarkut Shkodër, janë të pranishme në terren në fshatin Xath, duke koordinuar veprimet me forcat lokale dhe helikopterin për ndërhyrje. Kjo bashkëpunim i shkëlqyer mes institucioneve dhe komunitetit po kontribuon në menaxhimin e situatës në mënyrë efektive, duke garantuar një përgjigje të shpejtë për të mbrojtur mjedisin dhe sigurinë e qytetarëve.
Megjithëse situata ka patur tensione, angazhimi i forcave shtetërore dhe lokale dëshmon për një përpjekje të madhe për të përballuar këtë sfidë natyrore.
