Pas Botërorit të këtij viti, Zinedine Zidane pritet të marrë drejtimin e përfaqësueses franceze të futbollit. Sipas raportimeve nga e përditshmja ‘Le Parisien’, ekziston një marrëveshje verbale mes legjendës franceze dhe Federatës Franceze të Futbollit (FFF).
Presidenti i FFF, Philippe Diallo, bëri një njoftim surprizë gjatë fundjavës, duke thënë se e dinte emrin e pasuesit të Didier Deschamps. Ai theksoi rëndësinë e gjetjes së një trajneri që të plotësonte shumë kritere dhe të gëzonte mbështetje nga publiku, duke shtuar se kombëtarja e futbollit është e francezëve. Megjithatë, ai nuk e përmendi emrin e Zidane, edhe pse ka një konsensus të gjerë për këtë emër brenda vendit.
Zidane, ish-trajner i Real Madridit, ka pritur katër vjet për të marrë drejtimin e Francës, duke refuzuar oferta nga klube të ndryshme europiane. Po ashtu, nga deklaratat e Diallo, aludohet se FFF planifikon të formalizojë emërimin e tij pas Botërorit që zhvillohet në SHBA, Kanadë dhe Meksikë, duke shënuar përfundimin e një cikli 14-vjeçar të Deschamps në stolin e ekipit.
Ndërkohë, Zidane nuk ka bërë asnjë deklaratë publike së fundmi dhe pritet të presë konfirmimin e emërimit për të filluar një nga sfidat më të mëdha të karrierës së tij.
